Четвртата доза Фајзер вакцина ја намалила стапката на зарази со коронавирус меѓу повозрасните лица, но се чини дека заштитата од инфекција е краткотрајна, покажала голема израелска студија.
Заштитата од инфекција со коронавирус по втората бустер доза се намалила веќе само по четири недели, покажало истражувањето на израелските научници објавена завчера во списанието New England Journal of Medicine.
Стручњаците појасниле и дека заштитата од развој на потешки форми на болеста не исчезнала ниту по шест недели по примањето на дополнителната доза, но истакнуваат дека ќе бидат потребни дополнителни студии за да се процени колкава е долготрајната заштита.
Со студијата во која биле вклучени 1,3 милиони лица на возраст од над 60 години, проучувани се претходно собрани сознанија од базата на податоци на израелското министерство за здравство помеѓу 10. јануари и 2. март, кога преовладувала омикрон варијантата.
Резултатите од студијата се објавени пред состанокот на Агенцијата за храна и лекови на САД (ФДА) на кој ќе се разговара за потребата од дополнителни дози и една недела откако САД одобрија втора бустер доза за лицата постари од 50 години поради ширење на подваријантата омикрон BA.2 .
