Кајсиите се исклучително богати со нутритиенти кои поволно делуваат на дигестивниот тракт, кардиоваскуларниот систем и ги одржуваат здрави нашите очи и кожа, додека истовремено се сиромашни со калории. Во 100 грама кајсии има 48 калории и 2 грама влакна. Ова количество задоволува 39 % од дневните потреби за витамин А и 17 % за витамин Ц. Кајсиите содржат и помали количества на витамини од Б-комплексот, кои се неопходни за непречено функционирање на нервниот систем, а што се однесува до минералите, најбогати се со калиум (260 мг во 100 г), кој е од клучна важност за кардиоваскуларниот систем.
Претставуваат одличен извор на бета-каротен, лутеин и зеаксантин, кои покажуваат силни антиоксидантни својства.
Овие антиоксиданти придонесуваат за здравјето на очите и го намалуваат ризикот од катаракта, макуларна дегенерација и болести на мрежницата како резултат на дијабетес.
Кајсиите содржат и катехини, флавоноиди кои, исто така, се наоѓаат во праските, јагодестото овошје, јачменот, какаото, црниот и зелен чај. Истражувањата покажале дека овие фитонутритиенти имаат значителни антивоспалителни дејства и дека би можеле да помогнат кај симптомите на ревматоиден артритис.
