За вашите коски да останат јаки, важно е навреме да поведете сметка за внесот на нутритиенти кои докажано придонесуваат за здравјето на коските. За почеток, за превенција од остеопороза важно е да внесуваме доволно калциум. За возрасните се препорачува дневна доза од 900 мг, со тоа што после 65 година се препорачува внес од 1200 мг дневно. Со овој минерал се најбогати млечните производи, но ако имате проблем со варењето на кравјото млеко, бирајте производи од козјо или овчо млеко, кои полесно се варат. Калциумот се наоѓа и во спанаќот, брокулите, скоквите, бадемите, лешниците, сусамот, киноата, сардините и сл.
Витаминот Д е од клучна важност за апсорпцијата на калциумот, па со самото тоа и за здравјето на коските. Преку храната се препорачува внес од 600 до 1000 ИЕ витамин Д дневно. Количеството на витамин Д во организмот ќе го зголемиме со престој и активности на отворено (во траење од 10 до 30 минути дневно), но, секако, при тоа би требало да се користи соодветна УВ заштита и да се одбегнува подолго изложување на сончевите зраци во периодот од 11 до 17 часот.
Уште еден важен нутритиент е силициумот. Овој олигоелемент ја подобрува искористливоста на калциумот, како и брзината на вградувањето на калцумот во коските. Меѓутоа, како старееме така се намалува нашата способност за складирање на силициумот во организмот. Дневната потреба за овој елемент изнесува од 10 до 25 мг. После менопаузата внесот од 40 мг силициум дневно се поврзува со подобра густина на коските кај жените. Меѓу најдобрите извори на овој олигоелемент, односно силициумот спаѓаат минералните води, интегралните житарки, урмите, бананите, како и чајот од надзмениот дел од коњско опавче.
