За лекување на новиот коронавирус се истражуваат 40 различни лекови, меѓу кои и нови формули, но и постоечки лекови кои инаку се користат во терапија за други болести. За дел од нив веќе се започнати клинички студии што, во зависност од фазата во која се наоѓаат и за кој лек станува збор, значи тестирање на пациенти.
Според податоците од Европската агенција за лекови (ЕМА), меѓу потенцијалните препарати против КОВИД-19 се лекови кои се користат за третман на ХИВ, маларија и некои автоимуни болести…
ПРОБЛЕМИ СО НУСПОЈАВИ
Еден од лековите за третман на ХИВ, во моментов се истражува во 15 центри во Велика Британија, а станува збор за формула која долги години наназад е под лупа. Идната недела се очекуваат податоци за неговата безбедност и ефикасност.
Потенцијалните нуспојави, односно безбедносниот профил на лекот, е задолжителен дел од истражувањето, но факт е од друга страна дека во вакви ситуации како пандемијата со новиот коронавирус се обидува да се дојде до терапија што побрзо. Од тие причини се испробуваат различни лекови, односно комбинации на оние посточеките. Засега кај нас, иако се дозволи примена на антивирусен лек и антибиотик, нема информации каков е ефектот од оваа комбинација кај пациентите заразени со новиот коронавирус.
Во Франција со недели постои јавна полемика за користење на оваа комбинација, за која вирусологот проф. Дидер Раулт тврди дека е ефикасна во лекувањето на КОВИД-10. Но, таму овие лекови се користат во тешки случаи на заболени со коронавирус. Од ЕМА нагласуваат дека оваа комбинација не смее да се применува без лекарски надзор, бидејќи може да дојде до сериозни нуспојави.
Ставот на Европската агенција е дека во моментов ниту еден лек не покажал ефикасност во лекувањето на новиот коронавирус.
Што се однесува пак на развојот на вакцина за новиот коронавирус, според податоците од агенцијата, две вакцини се влезени во прва фаза на клинички испитувања, што значи дека се спроведуваат тестирања на здрави доброволци.
“Поради сложеноста на процесот, тешко е да се предвиди временската рамка за развој на лекови и вакцини. Според моментално достапните податоци и постоечките искуства во развојот на вакцини, проценуваме дека ќе биде потребна најмалку една година за давање на одобрение за ставање во промет на вакцина против болеста КОВИД-19, како и обезбедување на доволни количини вакцини за примена кај голем број луѓе“, објаснуваат од ЕМА.
