Сите знаат дека не постои храна без калории, но американската нутриционистка д-р Лиза Јанг потсетува на десетина намирници, кои може да се јадат во големи количини, а притоа да не се поправите. Станува збор за овошје и зеленчук кои немаат скроб.
Полни се со вода, многу се хранливи, содржат влакна кои даваат чувство на ситост и имаат малку калории. Иако не изобилуваат со протеини, полни се со витамини, антиоксиданти и други хранливи состојки добри за здравјето, пишува „Индепендент“.
Д-р Јанг вели дека по консумирањето на следниве намирници организмот ќе ви биде благодарен, а линијата – топ!
Кељ
Содржи малку калории. Една порција (150 г) суров кељ има само 33 калории, но има речиси три грама протеини и 2,5 грама растителни влакна, кои ќе ве заситат. Исто така, содржи и омега-3 заситени киселини, кои најчесто се наоѓаат во рибите. Кељот е богат со витамини и фолна киселина.
Целер (стебло)
Речиси 95 проценти од целерот го сочинува водата, а во исто време е богат и со калиум, фолна киселина, влакна и витамин К. Една порција содржи 6 калории. Најдобро е стеблото да се јаде сурово, но треба да се внимава на чувањето затоа што после пет до седум дена во фрижидер губи многу антиоксиданти.
Боровинки
Одамна се познати по богатството на антиоксиданти. Ги содржат повеќе од кој било друг вид на овошје. Една чаша содржи само 85 калории.
Краставици
Краставиците во најголем дел се составени од вода. Имаат малку калории, а најдобро е да се јадат со кората, која изобилува со растителни влакна и витамин А, односно бета-каротен, кој е добар за видот. Се разбира, под улов да се органски одгледувани.
Домати
Најпознати се по големата количина на ликопен, кој придонесува за намалување на холестеролот и крвниот притисок, а црвениот пигмент од доматите е моќен антиоксидант кој го намалува ризикот од кардиоваскуларни болести. Најдобро е да ги консумирате свежи, но здрави се и во преработен облик. Полни се со витамини А, Ц и Б2, содржат влакна, фолна киселина и калиум.
Грејпфрут
Ги раствора маснотиите и е одличен за губење на тежината. Се смета за диететска храна. Полн е со влакна, дава долга чувство на ситост и го стабилизира нивото на шеќер во крвта. Во една половина грејпфрут има само 50 калории. Витаминот Ц од грејпфрутот го намалува ризикот од многу здравствени проблеми. Го намалува холестеролот, го подобрува варењето, заштитува од рак и проблеми со срцето.
Брокула
Многу хранлив зеленчук кога се јаде суров или варен на пареа. Содржи сулфорафан, кој делува антиканцерогено на начин што во цревата ја зголемува концентрацијата на некои корисни ензими. Покрај витамините А, Ц, Е и К во една порција брокула лесно сварена на пареа има 20 проценти од дневната количина на растителни влакна кои му се потребни на организмот. Во неа има само 31 калорија.
Диња
Дињата е полна со бета-каротен, облик на витамин А, кој му помага на здравјето на очите и добриот вид. Едно парче од ова овошје го снабдува организмот со калиум и дневно потребната количина на витамини А и Ц. 90 проценти од дињата е вода, а една порција има само 55 калории.
КАРФИОЛ Многу хранлив, карфиолот е полн со антиоксиданти, односно кверцетин, фитохемикалии кои имаат антиоксидантно дејство. Помага во борбата против хроничните болести. Карфиолот е одличен извор на фолна киселина, растителни влакна, витамин Ц и К. Една порција содржи 25 калории.
Капини
Како и другите зрнести плодови капините се полни со витамин Ц и биофлавоноиди, кои дејствуваат како силни антиоксиданти и спречуваат создавање на слободни радикали. Тие ја зголемуваат апсорпцијата на витамин Ц и помагаат во зачувување на колагенот, што е добро за кожата. Во една порција има само 62 калории.
Салата
Сите видови на салати имаат само 10 до 20 калории по порција. Иако со јадењето на салати во организмот нема да внесете протеини, сепак, ќе го снабдите витамини и хранливи материи како што се фолната киселина, железото и витамините А и Ц.
Портокали
Кога ќе се спомне ова овошје прво што ни паѓа на ум е витамин Ц, но ова цитрусно овошје има многу други корисни состојки. Покрај витамин Ц портокалите се богати со витамини Б1, Б9 (фолна киселина) и А, како и калиум, калциум и влакна. Спаѓа меѓу најмоќните борци против рак и содржи 58 познати антиканцерогени состојки. Еден портокал со средна големина содржи околу 80 калории.
Јагоди
Во една порција јагоди има повеќе витамин Ц отколку во еден портокал. Доволна е порција од 150 г за да се задоволи дневната доза на витамин Ц. Полни се со полифеноли, калиум и растителни влакна, богати се со вода (90 проценти), сиромашни со шеќер (10 проценти) и целулоза. Станува збор за едно од најмалку калоричните овошја – само 35 калории на 100 г.
