Во зима е ладно, во лето е топло, време никогаш доволно… Изговори еден куп кога станува збор за тоа зошто не можеме да вежбаме. Сепак, можеби информациите од најновото истражување ќе ве натераат да облечете патики за трчање и да започнете да вежбате – имено, бранот на ендорфин заслужен за чувството на еуфорија, ги зафаќа оние кои вежбаат после нешто помалку од десет минути. Поточно, после девет минути и 44 секунди, покажало истражувањето спроведено кај луѓе кои вежбале три пати неделно.
Истражувањето, исто така, покажало и дека оние кои редовно вежбаат побргу стигнуваат до оваа состојба. На жените им е доволно во просек девет минути и седум секунди, додека на просечниот маж му треба една минута повеќе.
Кога станува збор за годините, најтешко им е на оние во возрасната група од 35-44 години, бидејќи еуфоријата стигнува кај нив после 12 минути и 47 секунди. Одлично се покажале и луѓето од 45 до 54 години, кои ги обзема ендорфинот после седум минути и четири секунди од почетокот. Најбрзи се младите луѓе помеѓу 18 и 24 години, кои во состојба на еуфорија влегуваат за помалку од седум минути.
Битно е и што вежбате. До ендорфинот најбргу стигнуваат љубителите на теретаните, следуваат тркачите, потоа луѓето кои сакаат групно вежбање, а најбавни се оние кои практикуваат одење.
