Кивито содржи ензим кој се нарекува актинидин, а кој го потпомага варењето на протеините од животинско потекло т.е. протеините од месото, рибата, јајцата, млечните производи. Интересно е дека токму овој ензим е одговорен за алергијата на киви, како и дека кај некои личности може да предизвика симптоми на алергиска реакција како чешање и печење во устата и црвенило (уртикарија).
Со помош на актинидинот телото може побрзо да ги искористи протеините од храната, додека истовремено се намалуваат евентуалните дигестивни пречки. Едно киви на крајот од оброкот би требало да го забрза и олесни процесот на варење.
Кивито, исто така, е богато со диететски влакна кои го забрзуваат поминувањето на храната низ цревата, помагаат во регулацијата на нивоата на холестерол и во одржувањето на стабилноста на нивоата на шеќер.
