Брзото ширење на омикрон варијантата на коронавирусот, која предизвикува поглаба форма на КОВИД-19 во споредба со претходните форми, поттикна мислења според кои КОВИД-19 моментално претставува помал ризик отколку во минатото, поради што некои се прашуваат зошто сега да се трудиме да спречиме зараза ако сите, порано или подоцна ќе бидеме изложени на вирусот.
Стручњаците се обидоа да одговорат на ова прашање.
И ПОНАТАМУ МОЖЕ ДА ЗАБОЛИТЕ ОД ПОТЕШКА ФОРМА НА БОЛЕСТА
Истражувањата покажуваат дека е поверојатно омикрон да резултира со асимптоматска форма на КОВИД-19 во однос на претходните варијанти. Меѓу лицата кои имаат симптоми, поголемиот број имаат многу блага форма на болеста, како болка во грлото или течење на носот, но немаат потешкотии со дишењето што беше типично за претходните инфекции.
Но, исклучително брзото ширење на омикрон во многу земји во светот значи и тоа дека во апсолутните бројки од потешка форма на болеста ќе заболат повеќе луѓе. Конкретно, неодамнешни податоци од Италија и Германија покажуваат дека луѓето кои не се вакцинирани се многу поподложни на хоспитализација, се сместуваат на одделите за интензивна нега и смртен исход.
“Се согласувам дека порано или подоцна сите ќе бидат изложени на вирусот, но подобро е тоа да се случи што подоцна“, смета стручњакот за вируси Мајкл Нусенцвајг од Универзитетот Рокфелер. “Зошто? Бидејќи подоцна ќе имаме поквалитетни, подобри и подостапни лекови и подобри вакцини“.
МОЖЕ ДА ЗАРАЗИТЕ ДРУГИ ЛИЦА
“Иако може да имате само блага форма на болеста, вирусот и понатаму можете да го пренесете на некој кој е во ризична група и поподложен на смртен исход, дури и ако имате антитела што сте ги стекнале од претходната инфекција или со вакцинација“, вели проф. Акико Ивасаки, вирусен имунолог од Универзитетот Јеил.
ДОЛГОРОЧНИТЕ ПОСЛЕДИЦИ ОД ОМИКРОН СЕ УШТЕ СЕ НЕПОЗНАТИ
Заразата со претходните варијанти на коронавирусот, вклучително и благи инфекции и ‘пробивни’ случаи по вакцинација, во многу случаи има предизвикано долготраен, исцрпувачки ковид синдром.
“Се уште немаме податоци за тоа колкав дел од инфекциите со омикрон завршиле со долг КОВИД. Сите оние кои го потценуваат омикрон, сметајќи го за блага варијанта, се изложуваат на ризик од исцрпувачка болест која може да трае со месеци или години“, предупредува Ивасаки.
Притоа, се уште е непознато дали заразата со омикрон на крајот ќе резултира со било каков ‘тивок’ ефект кој што е забалежан кај претходните варијанти, како на пример создавањето на автоантитела, оштетување на семената течност или промени на клетките што произведуваат инсулин.
НЕДОСТАТОК НА ЛЕКОВИ
Треба да се има предвид дека два од трите лекови користени за време на претходните бранови на коронавирус не се ефикасни против оваа варијанта. А третиот лек, што о најави друга фармацевтска компанија недостасува. Исто е и со новиот орален антивирусен лек Паксловид на компанијата Фајзер, кој се покажа ефикасен против омикрон. Имајте на ум дека, ако се разболите, можеби нема да имате пристап до лекување.
ПРОБЛЕМ СО ПРЕПОЛНИ БОЛНИЧКИ КАПАЦИТЕТИ
Меѓу целосно вакцинираните лица кои примиле и бустер доза и од претходно не боледуваат од било какви хронични болести омикрон “нема да направи премногу штета“, вели Дејвид Хо, професор по микробиологија и имунологија на Универзитетот Колумбија. Но, сепак, колку помалку заразени, толку подобро, особено сега “кога болниците се веќе преполни, а пикот на бранот омикрон допрва доаѓа“, додава Хо.
Поради рекордниот број на заразени пациенти, болниците мораа да ги одложат однапред договорените хируршки интервенции, како и лекувањето на онколошките пациенти. За време на претходните скокови во бројот на заразени и на оние на кои поради КОВИД-19 им била потребна хоспитализација, преполните болници не беа во можностна соодветен начин да лекуваат останатите итни случаи, како на пример, срцевите удари.
ПОВЕЌЕ ЗАРАЗЕНИ ЗНАЧИ И ПОВЕЌЕ НОВИ ВАРИЈАНТИ НА ВИРУСОТ
Омикрон е петта варијанта на оригиналниот вирус SARS-CoV-2 и останува да се види дали неговата способност за понатамошна мутација ќе се забави.
Треба да се има предвид дека високата стапка на инфекции му дава на вирусот и поголема можност за мутации, а нема гаранции дека новата варијанта на коронавирус ќе биде побенигна од претходните.
“SARS-CoV-2 во последните две години не изненади на многу различни начини , а ние и натаму не сме во позиција да го предвидиме еволутивниот пат на овој вирус“, истакнува Хо.
