Босилекот спаѓа во семејството зелјести билки меѓу кои се ароматичните билки како нането, жалфијата, рузмаринот, мајчината душичка… Исклучително е богат со антиоксиданти, особено рузмаринска киселина, како и фенолни киселини и флавоноиди. Овие состојки поседуваат противвоспалителни својства и заради тоа босилекот се препорачува со цел ублажување на симптомите кај инфламаторни болести на цревата, како и отоци и болки кај артритис. Благодарение на состојките како што се еугенол, линаол, лимонен, естрагол и сл. босилекот се користи и заради своето силно антибактериско дејство.
Особено благотворно делува на системот на органи за варење. Оваа лековита билка го подобрува варењето, ги елиминира гасовите во цревата и ја ублажува надуеноста, ги олеснува болките и грчевите во цревата.
Кај дигестивни тегоби напијте се чај од босилек кој ќе го приготвите така што неколку листови сушен босилек ќе прелиете со провриена вода, ќе оставите да се излади и ќе процедите. Свежо приготвениот, топол чај од босилек пијте го два до три пати на ден после оброк.
Топлата напивка од босилек, исто така, окрепува, го ублажува уморот и ја подобрува концентрацијата.
И на крајот, благодарение на противвоспалителното и антибактериско дејство може да помогне и кај респираторните инфекции – кај тегоби како што се болки во грлото и кашлица, па затоа најдобро е во текот на денот да се пие топол чај од босилек или барем да се испира грлото со него.
