Еден до тројца спортисти на секои 100 000 жители ќе доживее ненадејна срцева смрт. Иако се јавува кај обата пола, таа е дури девет пати почеста кај мажите.
Просечната возраст во време на ненадејната смрт е 23 години. Речиси 40 % од спортистите имале помалку од 18 години во времето на трагичниот настан, а во 90 % од случаите, ненадејната срцева смрт се случила за време или непосредно по завршувањето на натпреварот во спортската арена.
Најчести причини кај спортистите на возраст до 35 години се хипертрофична кардиомиопатија (HCM), конгенитални аномалии на коронарните артерии, миокардитис, Марфанов синдром (со аортна дисекција) и аритмогена кардиомиопатија на десната комора. Голем број на вродени срцеви мани кои резултираат со комплексни нарушувања во срцевиот ритам или вклучуваат аномалии на големите крвни садови, транспозиција на големите крвни садови или пак пулмонална хипертензија се најчестите пречки за занимавање со спорт, особено од натпреварувачки карактер.
Спортистите се соочуваат со се посурови барања, а годините газат
Најчестите причини за ваквите трагични инциденти на теренот се кардиоваскуларните болести, кои кај најголемиот дел од спортистите не биле откриени навреме, односно пред почетокот на занимавање со спорт. Причините треба да се бараат во дисбалансот помеѓу се поголемиот телесен напор и можностите на спортистите, а прекинувач се најчесто преголемите напори. Се поголеми се амбициите на тренерите, играчите, но и околината, додека можностите на организмот се ограничени. Со таквите амбиции, спортистите обично се принудени да ги интензивираат своите тренинзи, притоа намалувајќи го времето за одмор и обновување на организмот.
Најдобра превенција за спортистите, советуваат лекарите, е темелен систематски преглед, чија цел е рано и навремено откривање на срцеви аномалии. Луѓето со дијагностицирана срцева болести никако не смеат да се занимаваат со натпреварувачки спортови.
