Меѓународен тим на истражувачи дошол до зачудувачко и важно откритие: Се чини дека вирусот го провоцира човечкото тело да произведува оружје со кое ќе ги напаѓа сопствените ткива.
Ова откритие може да ги разјасни бројните клинички мистерии поврзани со КОВИД-19, од збунувачки колекции на симптоми кои се појавуваат со инфекцијата, преку долготрајни болести и симптоми кои траат и месеци откако таа ќе се повлече, до појава на мултисистемски хиперинфламациски (воспалителен) синдром , како кај децата (MIS-C), така и кај возрасните (MIS-A), пренесува WebMD.
Наодите сугерираат дека вирусот може директно да предизвика автоимуност, што би било фасцинантно, вели главниот истражувач Пол Уц, стручњак за имунологија и автоимуност од Универзитетот Стенфорд.
Студијата исто така укажала на можноста и други респираторни вируси да делуваат на сличен начин и така отвораат пат на автоимуните болести, како мултипла склероза, ревматоиден артритис и лупус.
Поради тоа, научниците во следниот чекор ќе го проучуваат грипот за да видат дали тој вирус може да ја предизвика оваа појава. При тоа се се смета дека тоа може да се очекува оти коронавирусот не е единствен кој предизвикува такви работи во човечкото тело.
Студијата опфатила податоци од над 300 пациенти од четири болници: две во Калифорнија, и по една во Пенсилванија и Германија, а била почната откако неколку помали детални истражувања дошле до слични заклучоци.
Истражувачите користеле крвни тестови за да ги проучат имунолошките одговори на инфекцијата и ги истражувале автоантителата, антитела што организмот ги создава на сопствените антигени. Овие автоантитела потоа биле споредени со оние пронајдени во лицата кои не биле заразени со новиот коронавирус.
Се покажало дека автоантителата биле почести по КОВИД-19: 50 проценти од хоспитализираните имале автоантитела, во споредба со помалку од 15 проценти здрави и незаразени. Исто така, кај речиси една петина од заразените бројот на автоантитела се зголемувал со напредување на инфекцијата. Тоа би требало да значи дека автоантителата директно се поврзани со вирусната инфекција и дека претходно не постоеле.
Некои од нив ги нападнале клучните компоненти на имуниот систем, како интерфероните. Тие протеини им помагаат на заразените клетки да повикаат засилување и може да ја попречат способноста на вирусот да се копира.
Претходни студии покажале дека лицата со послаба функција на интерфероните, како и оние кои создаваат автоантитела против тие протеини, се посклони кон развој на живото-опасни инфекции. Истражувањето покажало и дека некои луѓе имаат автоантитела кои ги напаѓаат мускулите и сврзните ткива, како кај некои ретки пореметување. Уц вели дека студијата ја започнале откако виделе пациенти со необични симптоми кои повеќе наликуваат на автоимуните болести отколку на вирсни инфекции: кожен осип, болки во зглобовите, замор, болни мускули, отекување на мозокот, суви очи, згрутчување на крвта, оспаление на крвните садови.
“Не знаеме дали тие пациенти ќе продоат да развиваат автоимуни болести“, предупредува Уц и најавува долготрајна битка со КОВИД-19, велејќи дека “мораме да сфатиме дека овој вирус ќе нанесе долгорочни штети на преживеаните, а ова зло ќе го проучуваме уште многу години“.
