Британските медиуми пренесуваат предупредување на стручњаците дека е можно истовремено лице да се зарази со две варијанти на коронавирусот SARS-CoV-2. Таков случај е евидентиран во Белгија, каде невакцинирана 90-годишна жена се заразила со алфа и бета сојот, првично индетификувани во Велика Британија и Јужна Африка, и во март починала во болница. Стручњаците претпоставуваат дека ја заразиле две различни лица.
Случајот со жената од Белгија бил предмет на расправа на овогодинешниот Европски конгрес за клиничка микробиологија и заразни болести. Стручњаците од тој собира порачуваат дека се верува дека случајот од Белгија е првиот документиран во светот, иако за жал не е и единствен.
Лидерот на научниот тим, д-р Ана Ванкерберген од болницата ОЛВ вели дека двете варијанти со кои била заразена 90 годишната жена, веќе извесно време кружат во Белгија.
“Пациентката веројатно е заразена со различни вируси од две различни индивидуи. За жал, не знаеме како се заразила“, вели научничката, додавајќи дека жената живеела сама, но и помагале многу луѓе.
Во јануари годинава, бразилските научници информираа дека две лица биле заразени со две варијанти на коронавирусот истовремено, од кои едната била загрижувачката Гама. Португалските експерти неодамна лекуваа 17-годишно лице кое се заразило со друг сој на коронавирус додека се уште се опоравувала од првичната ковид инфекција.
Вирусите постојано мутираат преку размножување, создавајќи нови, поотпорни варијанти или соеви, како што е загрижувачката делта варијанта, која стана доминантна и во Велика Британија. Експертите се убедени дека постојните вакцини исто така обезбедуваат добра заштита и од делта, но забрзано развиваат и нови вакцини, поприлагодени на новите варијанти. Овие вакцини може да се користат и за ревакцинација.
Проф. Лоренс Јанг, вирусолог од Универзитетот Ворвик, не е изненаден од откривањето на две варијанти кај една личност.
“Тоа можело да го рашири едно заразено лице, а таквата инфекција е можна и преку контакт со многу заразени лица“, вели Јанг, додавајќи дека се потребни дополнителни истражувања за да се утврди дали ваквите инфекции ја загрозуваат ефикасноста на вакцините и дали ги влошуваат исходот од КОВИД-19.
