Доколку не го проветруваме домот редовно, тоа може да предизвика развој на болести на срцето и рак, како и проблеми со дишењето, тврдат стручњаците од Велика Британија, кои утврдиле дека заради непроветрување загрозени се околу 15.3 милиони домови.
Докажано е дека во воздухот во домовите циркулираат околу 900 различни честички и биолошки материјали со потенцијално негативно влијание на здравјето, вклучувајќи мувла, прашина, јаглерод моноксит, првут, плин…
Со редовно проветрување на домот ризикот од болести се намалува речиси за 40%. Притоа најголема опасност е плинот и соединенијата за кои не сме свесни. Многу е опасен јаглерод моноксидот, кој е честа причина за случајна смрт во домовите, кој може да се развие од многу ситуации: од неисправен шпорет, неисправна греалка на плин, затнати оџаци или ако запалиме темјан или свеќа, а го има и во димот од цигарите.
Проветрувањето на домот четири пати на ден, од три до седум минути може да го намали ризикот од разни видови на болести кои често се манифестираат со едноставни симптоми, како што се кашлица, главоболка, осип, солзење на очите, кивање, вртоглавица, чувство на замор, крварење од носот или болести на белите дробови.
Препорачливо е кога ќе станете наутро веднаш да проветрите, особено кога станува збор за станови каде што има ПВЦ столарија која херметички го затвора просторот. Преку ден во секоја просторија повремено отворајте ги прозорците. И пред спиење корисно е на кратко да направите провев од три до пет минути, за да се смени воздухот во просторијата.
Особено внимавајте на мувлата во домот, бидејќи нејзината присутност го зголемува ризикот од респираторни заболувањња (алергија, астма и други проблеми со дишните патишта) и реакција на кожата.
