Еден од исклучително важните минерали во нашето тело е калциумот чија клучна задача е да го зајакнат нашиот скелет. Околу 98% од калциумот во телото се наоѓа во коските, а овој минерал е нужен и за одржување на заботе, срцето, нервите и мускулите здрави.
Недостатокот на калциум може да доведе до остеопороза, како и до можни фрактури на колкот, ‘рбетот и зглобовите. Исхраната со малку калциум е еден од неколкуте фактори кои може да го зголемат ризикот од губење на коскената маса.
Што предизвикува недостаток на калциум?
Жените во менопауза се изложени на поголем ризик да развијат дефицит на калциум бидејќи годишно губат околу 1% од нивната минерална густина на коските. За да ги одржувате коските цврсти по менопаузата кога ризикот од остеопороза се зголемува поради пониските нивоа на естроген, се препорачува внес од 1200 милиграми калциум дневно.
Млечните производи се полни со калциум и збогатени се со витамин Д. Дефицитот на калциум може да се појави кај лица кои не јадат млечни производи.
Лицата кои имаат хипопаратироидизам (ретко нарушување во кое телото произведува премалку паратироиден хормон), исто така, може да имаат недостаток на калциум.
Недоволното ниво на магнезиум и витамин Д исто така може да доведе до ниски нивоа на калциум.
Симптоми на недостаток на калциум
Недостатокот на калциум обично е потешко да се воочи бидејќи најчесто не се појавуваат никакви симптоми кои би го сугерирале тоа. На пример, лицето може да има остеопороза без да биде свесен за тоа додека не скрши коска.
Од друга страна, може да се појават и некои многу посериозни состојби кои укажуваат на недостаток на калциум, без да почувствувате никакви симптоми. Една таква состојба е хипокалцемија.
Сепак, во некои случаи недостатокот на калциум може да се манифестира низ следниве симптоми:
- Чувство на пецкање или боцкање во рацете и стапалата
- Грчеви во мускулите
- Претерана нервоза
- Главоболки
- Грчеви во мускулите на дланките, стапалата, рацете, нозете или лицето
- Сува и груба кожа
- Трнење во устата или прстите
- Замор
- Чувство на слабост
- Постојано опаѓање на косата
- Неправилен ритам на срцето
Лекарите советуваат да го посетите вашиот матичен доктор доколку ги почувствувате овие симптоми. Екстремно ниското ниво на калциум може да предизвика оштетување на бубрезите, депресија, биполарно растројство, калцификација на мозокот, срцева слабост, напади или кома.
