Има само седум години, а веќе е модел на позната агенција која ги слави различностите.
Иако е родена со Даунов синдром, преслатката Грејс Изабела Вартон и нејзиното семејство не дозволиле тоа ја дефинира. Досега позирала за компанијата Behind scars и Дизни и веќе има повеќе од 1000 следбеници на Инстаграм.
„Грејс обожава да позира пред камерите. Отсекогаш била харизматична и сакала да шета по писта. Вниманието и годи“, вели нејзината мајка Шерил, која кога дознала дека нејзиното бебе има Даунов синдром, била неутешна, но абортусот не бил опција.
„На почетокот бев поприлично тажна. Дауновиот синдром со себе носи толку негативни работи. Плачев со часови. Но следното утро со сопругот решивме да го задржиме бебето без оглед на се. Од тој момент почнав да обожавам се што е во врска со неа. Тоа е неверојатно“, вели Шерил.
Тогаш не ни можела да замисли дека неколку години подоцна нејзината ќерка ќе има толку самодоверба.
„На Фејсбук видовме дека се бараат модели со инвалидитет и си рековме зошто да не. Една недела подоцна Грејс беше повикана на првата фотосесија. Дизни покажа интерес за неа, како и Би-би-си“, раскажува Шерил.
Грејс сега работи за агенцијата Zebedee Management која ги слави различностите и која им го менува животот на лицата со инвалидитет. Основачот на оваа агенција Лаура Џонсон вели: „Сакавме да го смениме тоа што во светот на модата, телевизијата и филмот нема доволно можности за лицата со инвалидитет. Во почетокот беше тешко, но сега веќе имаме околу 300 модели кои работат за нас. Знаевме дека Грејс ќе биде одлична во ова. Секогаш е насмеана и величествена.“
И учителката на Грејс, Шарлот Вилијамс, го препознала нејзиниот талент.
„Среќна сум што Грејс е во моето одделение. Секојдневно ме одушевува. Полна е со енергија. Најпопуларна е во одделението и сите сакаат да се дружат со неа“, рекла Шарлот.
Најголем проблем за Грејс е говорот и тоа што понекогаш луѓето околу неа не можат да ја разберат, како и повеќето лица со Даунов синдром. Шерил, Џон и Грејс се трудат да им покажат на родителите кои имаат деца со инвалидитет дека ништо не е невозможно.
„Потребно е луѓето да сфатат дек Грејс е само девојче кое има Даунов синдром. Таа секогаш ќе биде наша ќерка. Се надеваме дека општеството се менува на подобро. Таа е нашиот мал борец и се спротивставува на сите кои мислат дека нешто не може.“
