Зарипнатоста може да биде навистина мошне непријатен проблем, особено ако заради природата на вашата работа морате доста да зборувате или, пак, да пеете. Не очајувајте има решение! Неколку едноставни природни лекови би можеле да ви помогнат доколку сте го загубиле гласот.
Во случаи на проблеми со грлото важно е да се пијат многу течности – најмалку 1,5 литар дневно.
Пијте или за испирање на грлото користете чаеви од жалфија, бел слез, камилица, мајчина душичка или анис. Овие чаеви имаат антисептично и противвоспалително дејство така што помагаат и ако сте зарипнати како резултат на респираторна инфекција.
Медот, исто така, ја ублажува зарипнатоста така што ја дезинфикува и истовремено обложува иритираната слузокожа на грлото. Во филџан провриена вода измешајте супена лажица мед и со овој раствор правете гаргара во текот на денот.
И на крајот, штедете го гласот – зборувајте што е можно помалку и одбегнувајте дури и да шепотите. Иако ви се чини дека на тој начин го штедите грлото, шепотењето дополнително ги напрега гласните жици и само го забавува опоравувањето.
