Понекогаш се чини дека ако сакаме да се храниме поздраво треба да ги смениме сите навики. Со забрзаното темпо на живот и трка по заработувачка ретки се оние луѓе кои имаат време да го приготвуваат секој оброк дома од свежи намирници. Но да се храните здраво не мора да значи дека мора да биде скапо и комплицирано како што изгледа. И – не мора да се откажувате од храната што ја сакате – само треба да ја одберете варијантата која е поздрава.

Засилувачи на вкус

Познато е дека засилувачите на вкус може да имаат негативен ефект врз човековиот организам. Нивната основна задача е да се подобри и зајакне вкусот на храната, но исто така влијаат и на апетитот. Познато е дека со долгорочно и неумерено консумирање на производи со додаток на засилувачи може да дојде до појава на зависност од одредени прехранбени производи. Истражувањата покажуваат дека лицата кои консумираат храна која содржи мононатриум глутаминат (MSG), јадат поголеми количини од истата храна, што како последица има и поголем енергетски внес и повеќе килограми. MSG се користи во прехранбената индустрија како најчест засилувач за вкус, но постојат и многу други кои, исто така, го зголемуваат апетитот и можат да создадат зависност.

Вештачки бои

Во прехранбената индустрија е дозволено користење на синтетички, односно вештачки бои, но во строго ограничени количества. Ограничувањата постојат поради тоа што за некои вештачки бои е докажана токсичноста, поради што овие додатоци мора да се нагласат на декларацијата на производот, со предупредување дека може да предизвикаат алергиски реакции, нарушување на активноста и вниманието кај децата, но и кај возрасните. Поради сето наведено синтетичките бои треба да се избегнуваат во производството на месо и месни производи, бидејќи во модерната месна индустрија лесно може да се заменат со природни зачини. Црвената боја и нејзиното зачувување се постигнува со суво или мокро солење и додавање на природни зачини кои и даваат боја на храната, а имаат и позитивен ефект врз организмот.

Глутен

Со оглед на тоа што глутенот е еден од најчестите алергени и во човековиот организам може да предизвика воспалителни процеси кај лица кои се чувствителни на неговото дејство, потрошувачите се повеќе го избегнуваат во својата исхрана. Иако не е нужно да имате глутенска интолеранција или да страдате од целијакија, обидете се да го исфрлите глутенот од исхраната и многу е веројатно дека ќе забележите подобро функционирање на системот за варење и помала надуеност.

Соја

Иако сама по себе е вредна намирница во производството, на пример, на месни преработки се користи како индустриски додаток во функција на стабилизатор, згуснувач, емулгатор, а некои производители со неа го заменуваат месото или мастите.