Да се зборува сам со себе е корисно за здравјето, потврдил експериментот на психолозите Даниел Суигли и Гари Лупијан. Зборувањето, според двајцата лекари, го тера мозокот да работи подобро, помага во организирање на мислите, исполнувањето на задачи и самоучењето. Научниците натерале 20 испитаници да побараат точно определен предмет во супермаркет еднаш додека молчат и втор пат додека го повторуваат името на предметот на глас. Се покажало дека додека гласно зборувале испитаниците ја исполниле задачата многу полесно. Тоа функционира, нагласуваат лекарите, само доколку точно знаете што барате.
„Зборувањето сами со себе не помага секогаш“, укажува д-р Лупијан.
„Ако не знаете како изгледа бараниот објект и да му го изговорите името нема да помогне или уште повеќе ќе ве забави во пронаоѓањето. Од друга страна, ако знаете дека бананите се жолти и имаат точно определена форма кога го кажувате зборот банана ќе ги активирате визуелните сознанија и ќе ги откриете полесно“, објаснува тој.
Децата, исто така, го користат овој метод за да си помогнат во учењето на секојдневните активности. Поголемите деца помнат и полесно се справуваат со различни занимации додека ги изговараат во процес на дејствување и сами си даваат инструкции.
Што се однесува до возрасните, разговорот сам со себе им помага да си ги организираат сопствените мисли. Разговорот сам со себе за претстојните предизвици и за осмислување на чекорите што ќе ги преземете во врска со нив помага многу, покажало истражувањето.
