Вашето тело во изминатите 9 месеци претпре оргомни промени. Нормално е после породувањето да чувствувате слабост и да ја немате истата кондиција од претходно.
Бидејки телото на жената после породувањето е послабо, поранливо и e поподложно на некои проблеми. Но не се грижете, тоа ќе трае само кратко. Наскоро на сето тоа ќе биде ставен крај, а вашата сила ќе се врати.
Најчести можни постпородилни проблеми се следните:
Инфекција на матката
Во нормални случаи плацентата се одвојува од ѕидот на матката и се исфрла по породувањето. Ако се случи да остане парче од плацентата во матката, може да се развие инфекција. Инфекцијата на околуплодовите обвивки за време на породувањето, исто така, може да доведе до инфекција на матката на мајката. Симптомите на инфекција се: висока температура, покачени леукоцити во крвта, забрзана работа на срцето, отекување на матката и исцедок со непријатен мирис. Кога ќе се инфицира и околината на матката, болката и треската можат да бидат многу силни. Инфекциите на матката вообичаено се третираат со антибиотици, за да се избегнат потенцијалните компликации. Доколку забележете знаци на инфекција, веднаш јавете се кај вашиот доктор
Инфекција на местото на царски рез
Консултирајте се со вашиот лекар ако забележите какви било знаци на инфекција: црвенило, потеченост на кожата, исцедок и сл. Обидете се да одолеете на желбата да ја чешате раната.
Болка во областа на перинеумот
Кај жените кои се породиле вагинално, вообичаена појава е болка во перинеумот (делот помеѓу вагината и аналниот отвор), особено ако била направена епизиотомија – рез на тој дел. Оваа болка исчезнува со напредокот на задравувањето од породувањето. Многу важно е после вршење нужда, да се бришете од напред кон назад. Така ќе спречите да дојде до инфекција на раната со бактерии од изметот. Ако седењето ви е непријатно, можете да се обидете да набавите перница во вид на крофна, со отвор на средината. Ако имате многу силни болки, докторот може да ви препише некое средство против болки, кое нема да се пренесе преку млекото до бебето. Кога ќе почувствувате дека сте спремни, можете да почнете повторно со кегеловите вежби. На тој начин повторно ќе ги зајакнете мускулите на перинеумот. Ако болката се зголемува или е постојана, престанете со вежбите и задолжително консултирајте се со вашиот доктор.
Опаѓање на косата
За време на бременоста хормоните го спречуваат нормалното опаѓање на косата. Затоа пак обично неколку месеци по породувањето, кога доењето ќе престане или ќе се намали, косата почнува интезивно да опаѓа. Ова многу жени ги доведува до ужас, но немојте да се грижите. Косата која ја губите во овој период е онаа што не опаднала за време на бременоста, затоа што била спречена од хормоните. Ова опаѓање е само привремено и вашата коса повторно ќе се врати на претходниот волумен.
Хемороиди и тврда столица
Хемороидите и тврдата столица се многу честа појава кај бремените жени и кај оние кои тукушто се породиле. Се појавуваат заради притисокот кој го врши зголемената матка или бебето врз вените во долниот дел од стомакот. Немојте да користите лаксативи, супозитории и сл. без да се консултирате со вашиот лекар, особено ако сте имале епизиотомија и имате конци во перинеалниот дел.
Неконтролирано испуштање на урина – уринарна инконтиненција
Неконтролираното испуштање урина е честа појава после породувањето, а поретко може да се случи и неконтролирано испуштање на фекалии. Испуштањето на урина особено е често кога жената се смее, кашла и сл. Причина која доведува до оваа појава е ослабениот тонус на мукулите. Со текот на времето, повторно се ќе се врати во нормала. Процесот на зацврстување на мускулите можете да го забрзате со практикување на кегеловите вежби. Ако проблемот продолжува или ако чувствувате печење, болка при мокрењето или ако имате неприроден нагон за итно мокрење, консултирајте се со вашиот лекар, тоа може да бидат знаци на инфекција на бешиката. Ако имате неконтролирано испуштање на фекалии, тоа може да се должи на истегнатите и ослабени мускули на перинеумот, кинење на перинеумот, повреда на нервите или кружните мускули околу аналниот овтор, за време на породувањето. Најчесто се случува кај жени кои имале долго породување. Со тек на времето, состојбата повторно ќе се врати во нормала. Доколку сепак состојбата не исчезне и по неколку месеци, разговарајте со вашиот доктор понекогаш може да биде потребна хируршка интервенција.
Непријатност за време на сексуалните односи
Со сексуалните односи можете да продолжите тогаш, кога ќе се чувствувате спремни физички и емотивно. После вагинално породување, најдобро е да почекате додека вагиналното ткиво целосно не заздраве, обично за тоа се потребни околу 6 седмици. Исто така, и доколку сте имале царски рез, веројатно, лекарот ќе ви препорача да почекате барем 6 седмици. Сексуалните односи може да ви бидат непријатни, па дури и болни до 3 месеци после породувањето, особено ако го доите бебето. Доењето го намалува нивото на хормонот естроген во телото, како резултат на што може да се јави вагинална сувост. Ова можете да го надминете со користење на лубриканти на база на вода. Не е ретка појавата и на чувствителност на перинеалниот дел, како последица на извршената епизиотомија и неколку месеци после породувањето. Дури иако вашето тело е целосно исцелено, уморот и исцрпеноста можат да ја намалат сексуалната желба. Разговорот со сопругот ќе биде многу важен за да го надминете овој период, имајте на ум дека сето ова е привремено.
