Бадемовото млеко е едно од најздравите растителни млека, кое се препорачува за лица кои не смеат да консумираат глутен. Не содржи лактоза, глутен, ниту холестерол, а содржи омега 3 масни киселини кои се есенцијални за здравјето на срцето. Богато е и со протеини – една чаша (250мл) бадемово млеко има околу еден грам протеини и околу еден грам диетални влкна. Една чаша млеко има 50 калории, мала количина на јаглехидрати и околу 3 грама масти. Бадемите се богати со витамини и минерали, па ова млеко не треба дополнително да се витаминизира. Бадемите содржат витамин Е, манган, селен, магнезиум, калиум, цинк, железо, влакна, фосфор и калциум. Флавоноидите во бадемовото млеко помагаат во превенција од рак и го забавуваат стареењето.
Направете го сами
Состојки: 1 чаша бадеми и вода (по желба може да додадете цимет или засладувач)
Подготовка: Бадемите ставете ги во ладна вода и оставете ги да стојат преку ноќ за да омекнат. Водата фрлете ја, а бадемите ставете ги во блендер претходно излупени. На една чаша бадеми додадете 4 чаши вода во блендерот. Откако бадемите ќе се изблендираат, смесата процедете ја низ газа. Добиеното млеко чувајте го во фрижидер и искоритете го во рок од 3 до 5 дена.
Млеко од соја
Лесно се вари, изобилува со белковини, јаглехидрати и квалитетни маснотии и има низок гликемиски индекс. Истражувањата покажале дека девојчињата на возраст од 5 до 11 години, кои пиеле млеко од соја, имаат помали шанси да заболат од рак на дојка подоцна. Не содржи холестерол, ниту лактоза. Одичен избор е и за лицата кои имаат проблеми со варењето. Содржи изофлавони – билни хормони кои делуваат како антиоксиданти и имаат поволно влијание на здравјето, ја штитат простатата, коските и го намалуваат ризикот од дегенеративни болести. Особено се препорачува за жени во менопауза, бидејќи 2 чаши соино млеко на ден, може значително да ги намалат тегобите кои жените ги имаат за време на менопаузата.
