Здружението на лекари по општа медицина – семејна медицина на Македонија го одбележува 19 Мај – Светски ден на семејниот доктор

Здружението на лекари по општа медицина – семејна медицина на Македонија го одбележува 19 Мај – Светскиот ден на семејниот доктор, со посебен настан што се одржа денеска, во утринските часови, во просториите на Македонското лекарско друштво, во чии рамки беше промовирана и монографија по повод 70 години постоење на Здружението на лекари по општа медицина –  семејна медицина на Македонија (1947-2017).

Матичните, семејните лекари се лидери во обезбедување на здравствена заштита во нашиот здравствен систем. Тие се основата на еден здравствен систем и нивната улога во обезбедувањето на континуирана, целокупна, сеопфатна здравствена грижа е од непроценлива важност

„Семејни – општи лекари – лидери на патот до подобро здравје“ е годинешното мото со кое  заедно со колегите од целиот свет, а по препорака на Светската организација на доктори по семејна и општа медицина (WONCA) се одбележува Светскиот ден на семејниот – општиот доктор.

„Пациентите му веруваат на својот матичен лекар. Веруваме дека институциите ќе ги препознаат и признаат нашите вредности и компетенции. Само на тој начин матичните лекари (лекари по општа медицина, педијатри, специјалисти по школска медицина, специјалисти по трудова медицина, специјалисти по општа медицина, специјалисти по семејна медицина), ќе се доближат до семејните – матичните лекари од целиот свет“, истакна д-р Катерина Ковачевиќ, претседател на ЗЛОМ СМ, на денешната средба со новинарите.

Улогата и придонесот на матичните лекари во системот за здравствена заштита е огромна. „Матичните, семејните лекари се лидери во обезбедување на здравствена заштита во нашиот здравствен систем. Тие се основата на еден здравствен систем и нивната улога во обезбедувањето на континуирана, целокупна, сеопфатна здравствена грижа е од непроценлива важност. Лекарите секојдневно се соочуваат со предизвици во обезбедувањето на грижата и сочувувањето на здравјето на нашите пациенти, имаме специфичен приод којшто му е потребен на пациентот, нега насочена кон пациентот, сеопфатен, холистички пристап. Умешноста да го вклопите сето тоа во обезбедување на грижата е навистина неопходна и потребна за да го направиме тоа“, ни изјави д-р Ковачевиќ, која порачува пациентите да му веруваат на својот матичен доктор, што е и годинешно мото на одбележувањето на Светскиот ден на семејниот доктор во Македонија.

Претседателката на ЗЛОМ СМ вели дека Здружението ќе продолжи со ентузијастичката работа, но и дека има уште многу работа, резултатите ги презентираат секојдневно, а се вклучени се многу сегменти: во промоција на здравје, во рана дијагноза, во научно-истражувачки работи…

Во одбележувањето на 19 Мај се вклучи и Центарот за семејна медицина и Катедрата по семејна медицина при Медицинскиот факултет, кои имаат тесна соработка со Здружението на лекари по општа и семејна медицина.

„Центарот и Катедрата имаат основна улога во едукација на студентите. Заедно со Здружението ја извршуваме таа едукација, а покрај тоа ги вклучуваме студентите во бројни проекти, се се цел афирмација на семејната медицина, со надеж дека они утре ќе бидат идните семејни лекари. Покрај работата со студентите, Центарот и Катедрата имаат улога и во специјализацијата и континуираната медицинска едукација на општите лекари и повторно заедно со Здружението тука сме доста активни во промовирање на основните принципи на семејната медицина, се со цел да се создадат компетентни, квалитетни општи, семејни лекари, кои ќе можат да одговорат на потребите на пациентите“, истакна доц. д-р Катарина Ставриќ, координатор на Центарот за семејна медицина.

Во рамки на Светскиот ден на семејниот доктор матичните лекари организираат активности во своите амбуланти или средина во која работат за промоција на здравје и здрави навики, превенција – идентификација на ризик, имунизација, скрининг, едукација и советување.

Бројката на специјалисти по семејна медицина на ниво на цела држава изнесува 400, споредено со вкупната бројка на матични лекари која е околу 1 500

Д-р Катерина Ковачевиќ, претседател на ЗЛОМ СМ: Верувајте му на својот матичен доктор!

„Сакам да им порачам на сите да му веруваат на својот матичен доктор, да му дозволат да го направи за нив сето она што ќе им го предложи, да му дозволат да биде и нивни лекар, и нивни застапник и нивни советник, затоа што тоа умее да го направи, да се поштедат од дополнителни оптоварувања во самиот здравствен систем доколку имат можност да го добијат тоа кај својот доктор. И, секако, помалку да читаат на интернет, а повеќе да се консултираат со своите матични лекари, зашто ние знаеме и умееме да им дадеме совети коишто им се потребни.“

Промовирана монографија по повод 70 години постоење на Здружението на лекари по општа медицина – семејна медицина на Македонија (1947-2017), во рамките на Македонското лекарско друштво 

Проф. д-р Катица Зафировска: Компилација на историски документи и анегдотални сеќавања на учесниците на настаните

„Не е лесно да се напише монографија, бидејќи таа претендира да направи еден историски осврт, долг период од 70 години, време во кое Здружението растело и се формирало. Таа промовира, всушност, два значајни настани и претставува една компилација на историски документи и анегдотални сеќавања на учесниците на настаните.

Треба да оддадеме голема благодарност на Јосиф Џочков за ентузијастичкото и високоновинарско пристапување во собирање, обработка, средување, организирање и комбинирање на разни документи и материјали, но секако, голема благодарност на сите соработници, членови на Здружението кои допринесоа монографијата да биде таква каква што е“, истакна проф. д-р Катица Зафировска во својот воведен осврт на монографијата.

Семејни-општи лекари – лидери на патот до подобро здравје

                          Пишува: Катерина Шекеровска-Димовска/katerina@panacea.mk