Бремените жени кои во текот на подоцнежните фази на бременоста и за време на доењето земаат додатоци на омега-3 масни киселини, може кај своето дете да го намалат ризикот од развој на алергии, укажува анализата на 433 студии, која ја пренесува „Plos Medicine“. Исто така, се покажало и дека земањето пробиотици во истиот период го намалуваат ризикот од развој на егзема (атопичен дерматитис).
Резултатите покажале дека земањето на омега-3 масни киселини, почнувајќи од 20 недела од бременоста и за време на првите 3-4 месеци од доењето го намалува ризикот од алергија на јајца за 30 проценти. Треба да се напомене дека жените во студијата земале стандардна дневна доза на омега-3 масни киселини.
Секојдневна употреба на пробиотици, пак, од 36 до 38 недела од бременоста и за време на првите 3-6 месеци од доењето го намалува ризикот од егзема за 22 проценти. Споменатите пробиотици главно ја содржеле бактеријата Lactobacillus rhamnosus.
Анализата, исто така, не нашла никакви докази дека избегнувањето на потенцијално алергенските видови на храна како што се јаткастите плодови, млечните производи и јајцата за време на бременоста го намалуваат ризикот од алергии или егзема кај децата.
Алергијата на храна се јавува кај едно од 20 деца. До неа доаѓа кога имунолошкиот систем на детето погрешно ја идентификува храната како закана и создава воспалителен одговор против неа. Егземата, пак, се јавува кај едно од 5 деца.
