Простатата е жлезда со големина на костен која се наоѓа во карлицата и ги поврзува мочниот меур и пенисот. Оваа состојба се нарекува уште и бенигна хиперплазија на простатата, што значи прекумерен раст на нормалните клетки.
Кога се работи за зголемена простата?
Простатата е со големина и форма на костен. По пубертетот, простатата нагло се зголемува и ја достигнува својата нормална големина. Просечните димензии се 3,5 x 4,5 x 2,5 см, а по четириесеттата година, големината повторно се зголемува. Важно е да се знае дека зголемената простата не секогаш значи здравствен проблем, туку може да се работи за нормален процес на стареење. Сепак, се препорачува редовно да се прават прегледи на простата.
Зошто доаѓа до зголемена простата?
Вистинската причина зошто доаѓа до оваа појава е непозната. Најверојатно, станува збор за промени во клетките, но и во самиот процес на стареење, кога се менуваат функциите и сите други работи во телото.
Дури и повеќе од 90 проценти од мажите постари од 80 години ја имаат оваа состојба.
Сепак, почесто ќе ја имаат лицата чии машки членови на семејството имаат или имале зголемена простата. Може и почесто да се појави кај лица кои имаат дијабетес, срцеви заболувања, еректилна дисфункција или прекумерна тежина.
Како да препознаете бенигна хиперплазија на простата?
Поради прекумерното зголемување на простатата, може да дојде до притискање на мочниот канал, а потоа и до послаб млаз на мокрење, често мокрење, нецелосно мокрење или итно мокрење кое вклучува изненадна потреба. Последица на тоа е и честото ноќно будење и одење во тоалет. Исто така може да се појават и други уринарни проблеми, како што се чести инфекции на уринарниот тракт или камења.
Во ретки случаи, оваа состојба може да доведе до оштетување на бубрезите и неможност за мокрење. Од друга страна, некои мажи кои имаат зголемена простата нема да имаат никакви проблеми или симптоми.
Како се дијагностицира зголемена простата?
Во случај на симптоми, потребно е да се посети лекар. Лекарот уште на допир ќе препознае дека простатата е зголемена, а за понатамошна дијагноза ќе биде потребно да се направат дополнителни тестови како крвна слика за да се види дали има проблеми со бубрезите, уринокултура за да се види дали се работи за некоја инфекција.
Во некои случаи, ќе биде потребно да се направи ултразвук на простатата или мочниот меур пред и по мокрењето, ПСA тест, односно специфичен антиген на простата или биопсија на ткиво за да се исклучи рак на простата.
Како се третира зголемената простата?
Самото лекување ќе зависи од сериозноста на состојбата, големината на простатата и симптомите, како и нивното влијание врз секојдневниот живот.
Некогаш ќе биде доволно само да започнете да вежбате и да ги зајакнете мускулите на карличното дно со Кегелови вежби или да го намалите кофеинот и алкохолот, да пиете помалку течност пред спиење, но повеќе во текот на денот и да избегнувате седење на ладни места.
Понекогаш состојбата ќе треба да се третира со лекови, а кога оваа терапија не помага или во комплицирани случаи, простатата ќе треба да се третира хируршки.
