Кељот е зелен лиснат зеленчук кој е достапен во текот на целата година, но врвот на сезоната на кељот е од крајот на есента до почетокот на пролетта.
Кељот, нутритивно се истакнува со своите антиоксиданти и противвоспалителни својства, високиот процент на микронутриенти и глукозинолати.
Поради таквиот состав, кељот исклучително поволно влијае на здравјето, но е многу послабо истражен во однос на своите сродни зеленчуци, зелката и брокулата. Освен со добро познатиот антиоксидант – витаминот Ц, кељот е богат со каротеноиди и флавоноиди кои исто така имаат антиоксидантни својства. Во кељот се откриени над 45 различни антиоксидантни фито соединенија поради кои му се препишуваат и антиканцерогени својства и улогата за заштитник на организмот од многу болести, предизвикани од оксидативни оштетувања.
Од каротеноиди се истакнуваат лутеинот и бета каротенот, а од флавоноидите најзастепни се кемферолот и кверцетинот. Противвоспалителните својства на кељот се уште не се доволно истражени, а се очекуваат позитивни резултати со оглед на тоа што содржи омега 3 масни киселини и витамин К.
Досегашните истражувања докажале дека антиканцерогениот ефект кељот го должи на високиот процент на глукозинатот. Најмногу истражувања се занимавале со карциномот на дебелото црево и дојка.
Позитивниот ефект на кељот тука не завршува. Поради своето антиоксидативно дејство, кељот одлично ги штити крвните садови и крвотокот. Консумирањето кељ, докажано го намалува нивото на холестерол во крвта. Најголема способност за намалување на холестеролот, кељот го има ако е подготвен на пареа.
Кељот е одличен извор на витаминот А, Б6, Б1 и Е, минеарлите бакар, манган, калциум, калиум, железо.
