Генетските фактори придонесуваат повеќе за ризикот од депресија кај жените отколку кај мажите, според една голема австралиска студија што може да помогне подобро да се разбере зошто жените се посклони кон оваа состојба.
Анализирајќи примероци од ДНК од речиси половина милион луѓе, истражувачите пронајдоа приближно двојно повеќе генетски „знамиња“ за депресија кај жените во споредба со мажите, објави истражувачкиот тим во списанието „Nature Communications“ .
„Веќе знаеме дека жените имаат двојно поголема веројатност да страдаат од депресија во текот на животот отколку мажите“, изјави во соопштението раководителката на студијата, д-р Британи Мичел, од Институтот за медицински истражувања QIMR Berghofer во Бризбејн, според Ројтерс.
„Досега, немаше многу конзистентни истражувања за да се објасни зошто депресијата различно влијае на жените и мажите, вклучително и можната улога на генетиката“, рече Мичел.
Тимот идентификувал околу 7.000 промени во ДНК-та што би можеле да предизвикаат депресија кај двата пола и околу дополнителни 6.000 промени во ДНК-та што би можеле да предизвикаат депресија само кај жените.
Истражувачите исто така откриле дека генетските фактори поврзани со депресијата се преклопуваат повеќе со гените за метаболички особини кај жените отколку кај мажите.
Разликите може да помогнат да се објасни зошто жените со депресија имаат поголема веројатност да доживеат метаболички симптоми како што се промени во тежината или променети нивоа на енергија, велат тие.
Истражувачите велат дека повеќето испитувања на лекови и терапии се тестираат на мажи и се надеваат дека нивната работа ќе придонесе за подобро клиничко разбирање на женската депресија.
„Овие наоди ја истакнуваат важноста од разгледување на генетските (фактори) специфични за полот во проучувањето на здравствените состојби, вклучително и големото депресивно растројство, отворајќи го патот за поцелни стратегии за лекување“, заклучија истражувачите.
