Ако вашиот термин за породување е зима или пролет, тогаш имате помала шанса да се соочите со постпородилна депресија, за разлика од жените кои раѓаат во останатите сезони од годината, покажа последната студија. Други фактори кои влијаат врз ризикот од постпородилна депресија, исто така, познат и како postpartum depression (PPD), ја вклучуваат и должината на бременоста, како и индексот на телесна маса.
Најмалку 10 отсто од жените искусуваат одреден степен на анксиозност или депресија после породувањето. Симптомите вклучуваат тага, немир и недостаток на концентрација. PPD вообичаено настанува поради комбинација на хормонални промени, психолошко приспособување на мајчинството и замор, објавуваат американските истражувачи.
Доктор Џи Џоу, од болницата „Brigham and Women’s“ во Бостон, Масачусетс, вели: „Сакавме да дознаеме дали постојат одредени фактори кои влијаат врз зголемување на ризикот од развој на постпородилна депресија кои може да се одбегнат за да се подобри здравјето на жената, и физички и ментално“.
Тимот разгледуваше медицински досиеја на 20 169 жени кои се породиле во периодот помеѓу јуни 2015 и август 2017 год. Од нив вкупно 817 (4,1 %) страдале од PPD.
Зошто породувањето во зима или на пролет би можело да има позитивен ефект – не е докрај познато, но би можело да биде поврзано со „сезонското уживање во затворени простории кои мајките го искусуваат со новороденчињата“, велат истражувачите.
Студијата, исто така, открива дека подолгата бременост го намалува ризикот од PPD, додека неупотребата на епидурална анестезија за време на породувањето – го зголемува. Белите жени биле помалку подложни на постопородилна депресија, отколку жените од другите раси, покажува истражувањето, додека начинот на породување немал никаков ефект врз PPD.
Наодите од истражувањето беа презентирани на годишната конференција на анестезиолози – Anesthesiology 2017 во Бостон.
