Поголема е веројатноста дека жените кои имаат срцев удар ќе умрат при итна хоспитализација во американските болници доколку ги лекува маж, предупредува новата студија, објавена во „Proceedings of the National Academy of Sciences“.
Истражувањето е базирано на повеќе од 500 000 пациенти примени поради акутен миокарден инфаркт (срцев удар) на Флорида, во периодот од 1991 до 2010 година.
Научниците од Харвад пронашле значајна разлика во преживувањето, во зависност од полот на пациентот и лекарот. Имено, кога пациентките ги лекува жена – доктор „постои позитивно влијание“ врз преживувањето, било наведено во студијата.
Кога пациентката ја лекува докторка „веројатноста за смрт е намалена за 5,4 отсто“, нагласува студијата
Со претходните истражувања било констатирано дека жените имаат поголема веројатност да умрат од срцев удар отколку мажите.
Студијата на Харвард дополнително ја објаснува тезата за родова нееднаквост во смртноста од срцеви заболувања. „Повеќето лекари се од машки пол, а мажите очигледно имаат проблеми во лекувањето на жените“, се вели во студијата.
Во истражувањето, исто така, се напоменува дека колку повеќе пациентки докторот лекувал во својата кариера, толку помала е веројатноста да умрат.
Но постои и т.н. „catch-22“, кој сугерира дека одреден број на жени мора да умрат, за докторот да може да научи од своите грешки.
Еден од главните проблеми е тоа што повеќето лекари се од машки пол, па затоа комбинацијата докторка-пациентка, не е секогаш можна. Како решение, едноставно се предлага да се зголеми бројот на докторки за итни случаи, заклучиле научниците.
