Резултатите од најновото научно истражување покажале дека консумирањето лук и кромид може да го намали ризикот од рак на дојка. Група професори од Универзитетот Бафало и Универзитетот во Порторико спровела истражување за поврзаноста на употребата на кромид и лук и заболувањето од рак на дојка. На крајот на опсежната студија дошле до мошне важни резултати кои покажале дека консумирањето на овие две намирници може да го намали ризикот од рак на дојка за дури 67 отсто. Истражувачката Гаури Десаи рекла дека во овој случај тие ставиле посебен фокус на Порторико бидејќи забележале дека има ниска стапка на рак на дојката.
„Порторико има помал процент на пациенти со карцином на дојка во споредба со САД поради што беше важно да се истражи населението таму“, рекла Десаи.
Објаснила дека дошле до сознанија оти жените во Порторико јадат многу повеќе лук и кромид, во речиси сè, од обични јадења до специјалитети со ориз и грав. Претходните студии, исто така, покажале дека кромидот и лукот имаат заштитни квалитети против ракот поради нивните антиоксидантни и ензимски својства, кои се борат против канцерот.
Студијата опфатила 314 жени на возраст меѓу 30 и 79 години, кои имале карцином на дојката помеѓу 2008 и 2014 година, како и контролна група, составена од 346 учесници, кои никогаш немале карцином. Тие одговориле на прашањата во прашалникот откривајќи ги нивните навики во исхраната, вклучително и зачестеноста на јадењето лук и кромид.
„Кај жените што јаделе лук и кромид повеќе од еднаш во денот имало 67 отсто намалување на ризикот од карцином на дојката во споредба со оние што никогаш не го јаделе“, рекла Десаи. Резултатите од истражувањето се објавени и во научното списание „Исхраната и карциномот“.
