Нормалната боја на столицата е смеѓа, и тоа поради здравото ниво на излачен билирубин и жолчна киселина. Понекогаш може да забележите дека столицата е со поинаква боја, вклучувајќи ја и жолта. Бојата може да се промени од разни причини вклучувајќи диета или медицински состојби. Ова се 8 најчести причини за појава на жолта столица кај возрасните.
Исхрана
Храната што ја консумираме може да влијае и на бојата на столицата. Морковот, слаткиот компир и куркумата може да предизвикаат жолта столица. И исхраната богата со масти и глутен исто така може да доведе до оваа појава.
Стрес
Стресот и анксиозноста може да имаат големо влијание на телото. Како резултат на тоа, телото може да не биде во состојба да ги апсорбира сите хранливи супстанци што може да доведе до пролив или жолта столица.
Целијакија
Доколку лицата кои страдаат од целијакија консумираат глутен, протеинот кој се наоѓа во пченицата ржот и јачменот, нивниот имун систем многу брзо ќе реагира. Освен со жолта столица, симптомите на целијакија може да се манифестираат и со пролив, запек, замор, мачнина, депресија и главоболка.
Пореметување во работата на панкреасот
Разни пореметувања во работата на панкресот (панкреатитис) може да предизвикаат жолта или бледа столица. Овие пореметувања вклучуваат хроничен панкреатитис, цистична фиброза, рак на панкреасот и блокада на каналите на панкреасот.
Болести на црниот дроб
Пореметувањата на црниот дроб, како што цирозата и хепатитисот, може да ги намалат или елиминираат солите на жолчката од телото. Тие се неопходни за разградување на храната и апсорпцијата на хранливите состојки. Елиминирањето на овие соли може да доведе до жолта столица.
Проблеми со жолчката
Проблеми со жолчката и камењата во неа, исто така може да го намалат нивото на солите во телото. Ова намалување може да доведе до различни симптоми како абдоминална болка, мачнина, жолта боја на кожата и бледа столица.
Гилбертов синдром
Гилбертовиот синдорм е наследно пореметување во работата на црниот дроб, а резултат е зголемена концентрација на билирубини. Симптомите може да вклучуваат и жолта столица, меѓутоа тие може да бидат многу благи, па повеќето лица не ни знаат дека го имаат овој проблем.
Гијардијаза
Гијардијаза е заразна болест на тенкото црево и е особено честа кај децата на места каде има лоши хигиенски услови. Симптомите вклучуваат грчеви во стомакот, пролив со жолта боја, главоболка, висока температура и нагло слабеење.
