Дали некогаш сте почувствувале болки во вратот или во грбот по предолго гледање во лаптоп, таблет или мобилен телефон? Ако одговорот е да, тогаш и вие сте станале дел од новиот глобален здравствен проблем.
Со се поголемата употреба на модерните технолошки преносливи помагала кои, мора да се признае го олеснуваат животот, доаѓа и до појава на „електронска епидемија на болка“, која е толку зачестена да здравствените стручњаци за неа смислиле нов медицински термин – „tech neck“.
Во слободен превод тоа означува здравствена тегоба и хронична болка во вратот предизвикана со подгрбавеното држење и свитканата глава додека предолго и пречесто гледаме во своите телефони, таблети, лаптопи…
Се поголемата опседнатост со технологијата влијае на здравјето, а стручњаците предупредуваат дека тоа е само почеток на проблемот и дека за некоја година ќе се откријат вистинските сериозни последици.
Неодамнешно истражување на американскиот универзитет Бајлор покажало дека технолошката зависност е поголема отколку што воопшто се смета. Резултатите покажале дека младите луѓе во просек поминуваат помеѓу осум и 10 часа на телефон и за целото тоа време телото им е подгрбавено во неприродна положба.
Голем дел од денот поминуваме со главата наведната нанапред, а тоа значи дека полека го навикнуваме телото на неприродна положба, ‘рбетот се деформира и телото старее многу побрзо отколку што треба, предупредуваат стручњаците.
Токму подгрбавениот грб, наведнатата глава и спуштениот врат се вообичаена поза додека се типка на телефоните, поради што доаѓа до силен притисок на вратниот дел од ‘рбетот.
ПОСЛЕДИЦИ
Последица се болки во вратот, главоболка, напнатост во рамената, а може да се јави и трнење на екстремитетите, па дури и проблеми со забите и вилицата. Сите тие проблеми директно се поврзани со неправилното и неприродно држење по предолга употреба на сите форми на модерната пренослива технологија, а бројот на лица со таков проблем, и тоа не само меѓу тинејџерите и адолесцентите, туку и меѓу возрасните, драматично се зголемува. Стручњаците предупредуваат дека во наредните 10 години тој број уште повеќе ќе се зголемува, а состојбата не е наивна, бидејќи гледано долгорочно, освен здравствени, сето тоа доведува и до емоционални проблеми, особено кај младите луѓе.
