Секогаш знаете кога времето ќе се смени, или кога ќе врне дожд. Имате лична прогноза која ви најавува дека се наближува невреме.
Колку и да делува ова како предност, всушност е многу непријатно. Чувството на болка на места каде порано сте се повредиле, често е показател на промена на времето. Но, зошто тоа се случува?
Научниците имаат одговор на прашањето – како можеме да почувствуваме промена на време и тоа преку деловите на телото кои сме ги повредиле порано. Имено, станува збор за своевиден феномен.
Оваа појава се проучува од почетокот на минатиот век, а научниците дошле до различни заклучоци. Уште за време на стара Грција се зборувало за болките во одредени делови на телото при промена на времето. Со оглед на тоа дека луѓето овој проблем ги мачи толку долго, научниците ја истражувале оваа појава и дошле до едноставно објаснување.
Врската меѓу болката и промените на времето е падот на атмосферскиот притисок кој предизвикува ширење на мекото ткиво и течностите во зглобовите, и на тој начин ги надразнува нервите, со што се предизвикува чуство на болка. Тоа е типично за артритични зглобови, или за зглобовите кои биле повредени.
Според некои истражувања, промените во атмосферскиот притисок може и да ја зголеми, но и да ја намали болката. Научниците го истражувале и влијанието на температурата и влажноста на воздухот на повредените делови на телото и болката, но не дошле до конкретни податоци.
