Дали често ви се случува да лежите во кревет, спремни да потонете во сон, но да не успевате затоа што ве чешаат градите? Истата ситуација ви се случува и на работа и морате итно во тоалетот за да го подесите градникот и да се почешате. Чешањето на дојките е потполно нормална појава и обично се јавува од иста причина како и чешањето на кој било друг дел од телото – како резултат на стимулација на нервните завршетоци. Меѓутоа, со оглед на тоа дека и најобичните симптоми се припишуваат на фатални заболувања, оваа појава често се доведува во врска со карциномот на дојки.
Вистина е дека чешањето може да биде знак за рак, поточно за воспалителен карцином кој може да предизвика црвенило, воспаление, болка и отоци, но тоа е прилично ретко. Постојат и други причини за чешање кои се многу поверојатни. Доктор Клер Морисон, британска докторка по општа пракса, смета дека оваа појава ретко е причина за грижа.
„Причините за овој вид чешање се најчесто сосема незначителни. Се јавуваат како резултат на иритација на градите, бременост, предменструални промени или хормонска терапија (вклучително и контрацептивни средства)… Исто така, може да бидат и последица на кожени заболувања како дерматитис, сува кожа, изгореници од сонце или алергија.
Освен тоа оваа појава може да ја предизвикаат одделни материјали во комбинација со физичка активност (синтетички градник при тренинг). Чешањето меѓу градите најчесто е резултат на преголема топлина и потење, што може да доведе до појава на потни осипи, пликови и габи.
Отстранете го сомнежот за рак на дојка
Значи, доколку често ве чешаат градите, пред да појдете на лекар со веќе самостојно воспоставена дијагноза на рак, прво отстранете ги можните причини.
Прашањата кои себеси треба да си ги поставите се следни:
- Дали градникот ви е неудобен?
- Дали прилично сте се испотиле за време на вежбањето?
- Имате ли сува, надразнета кожа и на други делови од телото?
- Дали доите?
Ако одговорот на овие четири прашања е негативен, тогаш се препорачува да појдете на лекар и да укажете на симптоми.
