Канадски научници од болницата Сент Мајклс во Торонто врз основа на следење на 1 037 испитаници, пресметале дека секојдневното консумирање варен грав или други мешунки може да се поврзе со пет отсто помала концентрација на ЛДЛ холестерол во крвта.
Учесниците во истражувањето на оваа исхрана се придржувале во просечно траење од шест седмици.
Во стручниот магазин „Canadian Medical Association Journal“ се додава дека повеќе испитаници биле со средна животна доба, а мешунките во поглед на контролата на лошиот холестерол биле нешто поефикасни кај мажите.
Истражувачите објаснуваат дека поголемиот удел на гравот и другите мешунки во исхраната резултира со намалување на консумацијата на намирници со поголемо количество масти или поголем гликемиски индекс. Освен тоа мешунките се добар извор на влакна, протеини од растително потекло, витамини и минерали.
