Лешниците претставуваат одличен извор на витамин Е (20 лешници подмируваат 21 % од дневните потреби за овој витамин), потоа фолна киселина и витамини Б1 и Б6. Кога станува збор за минералите, богати се со манган, бакар, калиум, магнезиум и железо.
Поволно делуваат на кардиоваскуларното здравје, регулирајќи го нивото на ЛДЛ и вкупен холестерол. Благодарение на масните киселини, влакната, калиумот и магнезиумот што го содржат, лешниците, исто така, помагаат и во регулирањето на крвниот притисок. Дневната препорачана доза од овие плодови изнесува 30 до 70 г.
Лешниците, исто така, би можеле да помогнат во превенцијата од карцином со оглед на тоа дека изобилуваат со антиоксиданти (особено проантоцијаниди), витамин Е и манган. Одделни истражувања, исто така, покажале дека лешниците (како и оревите и бадемите), благодарение на олеинската киселина придонесуваат за намалување на шеќерот во крвта, како и дека ја подобруваат чувствителноста на инсулин.
