Колку пати се случило партнерот да ви каже дека сте зборувале во сон или и вие да го слушнете партнерот како зборува додека спие? Научниците објаснуваат дека на овој начин се преживуваат силни чувства, односно силни емоции, кои биле доживеани преку ден.
Според статистиката, во сон најмногу зборуваат децата. Имено, 25% од децата и 5% од возрасните зборуваат во сон.
За што зборуваме?
Стручњаците долго се занимаваат со оваа тема, а до најблиски и најлогични објаснувања дошле руските стручњаци. Имено, по спроведеното истражување, резултатите покажале дека децата најчесто зборуваат во сон и на тој начин ги проживуваат бурните случувања кои ги доживеале во текот на денот.
На зборување во сон најчесто се подложни емотивните лица. Кај чувствителните лица се забележани специфични карактеристи во развојот на големиот мозок. Децата оваа навика, најверојатно, нема да ја задржат подоцна во животот.
Истражувањата покажале дека во сон зборуваат и луѓето кои страдаат од несоница или се под одреден притисок. На оваа појава влијаат и стресот, депресијата, алкохолот и високата температура.
Статистиката покажала дека голем број луѓе стрепат од можно откривање на некои тајни додека спијат. Меѓутоа, познато е дека во првата и втората фаза од сонот се јавува непознат и неврзан говор, односно неодредени монолози. Ваквите монолози не траат подолго од 30 секунди. Во наредните фази, лицата почнуваат да зборуваат и испуштаат неартикулирани гласови. Факт е, врз основа на истражувањата, дека се во прашање бесмислици и дека таквиот вид на зборување нема некоја смисла или значење.
Руските стручњаци напоменуваат дека нема потреба за грижа, во текот на сонот нема да изговорите ништо за што стравувате, ниту вие, а ниту партнерот. Како зборувањето започнува, така и завршува, за време на сонот. Доколку често зборувате во сон, а тоа ви претставува проблем, стручњаците советуваат да го исфрлите алкохолот од употреба, особено во доцните вечерни часови, како и кофеинот, и доколу е можно, ослободете се од стресот.
