Во Клиничката болница Дубрава во Загреб, почина 23 годишно момче како последица од КОВИД-19, а кој бил умерено обезен и имал хипертензија. По овој настан, д-р Иво Ивиќ, директор на Клиниката за инфектологија во Сплит, објаснува зошто коронавирусот е исклучително опасен за лицата со вишок и со прекумерна телесна тежина.
“Кога лицето е обезно, тогаш тоа има голем ризик фактор за неповолен исход од лекувањето. Имено, обезноста е оклоп околу градниот кош, кој не му дава на организмот нормално да диши и е многу опасна ако лицето се разболи од КОВИД-19“, вели д-р Ивиќ.
Тој објаснува дека во неговата болница е хоспитализирана и девојка на 18 – годишна возраст, која има потешка клиничка слика на КОВИД-19, а која има прекумерна телесна тежина.
“За среќа, таа не почина и се опорави. Но, на младите луѓе мора да им биде јасно дека ова заболување не ги напаѓа само возрасните и стари лица, туку и младите. Мораат да станат свесни дека колку КОВИД-19 помалку се шири, толку е помала опасноста тие да се заразат. А, за болеста помалку да се шири, сите мора да се вразумат и да ги почитуваат епидемиолошките мерки, оти во спротивно нема да има никаков успех, никаде“, вели д-р Ивиќ.
