Состојбата која се означува како “долг КОВИД-19“ го отежнува животот на болниот кој може да го исцрпи и најобична активност како прошетка. За жал, оваа состојба не е така ретка.
Со оглед дека досегашната цел на здравствените установи беше спасување на животите на тешко заболените, за трајните симптоми на оние кои ги преживеале малку се зборуваше. Но, навистина постојат трајни последици кои болеста предизвикана од новиот коронавирус ги остава на здравјето, а тие не се занемарливи.
Прашањата од типот зошто луѓето заболуваат од “долг КОВИД-19“ и дали некогаш целосно ќе се опорават се проткаени со нејаснотии.
ШТО Е “ДОЛГ КОВИД-19“?
Не постои стручна медицинска дефиниција на болеста која би потврдила колку точно трае долгиот КОВИД и која е листата на симптоми, бидејќи тежината, траењето, но и самите тегоби зависат од пациент до пацинет. Две различни лица со иста состојба може да имаат две целосно различни искуства.
Меѓутоа, најчестиот симптом е страшен замор.
Останатите вклучуваат: губење здив, отежнато дишење, кашлица што не поминува, болка во мускулите, проблеми со слухот и видот, главоболка, губење на чувството за мирис и вкус, како и оштетувања на срцето, белите дробови, бубрезите и желудникот.
Последиците на менталното здравје на пациентот исто така не се занемарливи, предупредуваат стручњаците, а тие вклучуваат анксиозност, па во некои случаи и депресија.
“Долгиот КОВИД-19„ може апсолутно да го уништи квалитетот на живот на луѓето.
“Мојот замор е како ништо што некогаш сум го доживеала…“, “Немам живот, само постоење“, признаваат оние кои страдаат од оваа форма на “продолжен“ коронавирус. А тој не ги погодува само оние на кои им требаат месеци да се опорават од престојот во интензивните оддели за лекување, може да им се случи и на оние чии симптоми биле релативно благи.
“Денес веќе не се сомневаме за постоењето на долгиот КОВИД-19“, вели проф. Дејвид Страјн од Универзитетот во Екстер.
Истражување спроведено на 143 пациенти примени во најголемата болница во Рим, покажало дека 87% од нив имаат симптоми два месеци откако заболеле.
Боледуваат ли од долг КОВИД-19 само оние кои имале тешка форма на болеста?
Според досегашните сознанија, не е нужно. Истражување спроведено на пациенти во Даблин потврдува дека и до 10 недели по дијагностирањето, бројни пациенти со полесни симптоми не биле во можност да се вратат на работа, пред се, поради замор и физичка исцрпеност. Лекарите не пронашле силна поврзаност помеѓу долготрајниот замор и јачината на инфекцијата.
Проф. Крис Брајтлинг смета дека оној дел од пациентите кои развиле тешко воспаление на белите дробови, спаѓа во “ризична група“ кога е во прашање продолжување на симптомите на КОВИД-19, поради оштетувањата на белите дробови.
Една од претпоставките е дека имуниот систем кај овие пациенти не успеал да се опорави, а се смета и дека преостанатите симптоми се потврда дека КОВИД-19 може да нанесе штета на организмот. Некои стручњаци сметаат дека болеста може да го промени и метаболизмот кај човекот, но овој дел се уште се истражува.
Пост-виралниот замор или кашлица се повеќе и од вообичаени симптоми – веројатно на сите некогаш во животот ни се случила инфекција од која сме се опоравувале со месеци. Но, со КОВИД-19 симптомите се посилни, а периодот не траење подолг.
“Единственоста во начинот на кој овој вирус го напаѓа домаќинот и во начинот на кој клетките се однесуваат, укажува на тоа дека КОВИД-19 предизвикува посилна инфекција од останатите вируси“, објаснува проф. Брајтлинг.
Можат ли пациентите со долг КОВИД-19 целосно да се опорават?
“Јас секако се надевам дека симптомите кај оние кои боледуваат ќе траат помалку од една година. Но, постојат сомнежи за долгорочно влијание на човечкото здравје. Во тој случај, следни инфекции би можеле да бидат поопасни за тие пациенти“, потенцира професорот.
