Зошто некои луѓе чувствуваат поблаги последици од КОВИД-19? Одговорот може да се крие во “тренингот“ на имуниот систем

Способноста за “помнење“ на имуниот систем може да објасни зошто кај некои луѓе болеста предизвикана од новиот коронавирус се манифестира поблаго отколку кај некои други.

Претходни инфекции со вируси кои предизвикуваат настинки може да го извежбаат имуниот систем да го препознае SARS-CoV-2 вирусот, кој предизвикува КОВИД-19, покажало ново истражување.

Студија објавена во списанието Science, открила дека имунолошките клетки, таканаречени Т-клетки кои препознаваат коронавирусни настинки, препознаваат и специфични места на SARS-CoV-2, вклучувајќи и делови на лошиот spike протеин кој овој вирус го корсти за врзување и за упад во клетките на човекот.

Оваа “меморија“ на имуниот систем може да објасни зошто некои луѓе имаат поблаги симптоми на КОВИД-19. Авторите истакнуваат дека оваа хипотеза е “многу шпекулативна“ и дека се потребни повеќе истражувања. Имено, се уште не е познато колку голема улога имаат Т-клетките во борба против КОВИД-19. Тие се само дел од сложениот систем на молекули и клетки кои се составен дел од нашиот имун систем.

Претходни студии покажале дека над 50 проценти од луѓето кои никогаш не биле изложени на КОВИД-19 имаат Т-клетки кои го препознаваат SARS-CoV-2. Тоа е воочено кај лица ширум светот, во Холандија, Германија, Велика Британија и Сингапур. Научниците претпоставиле дека овој постоечки имунитет би можел да биде последица од претходни инфекции со други коронавируси, особено оние кои предизвикуваат инфекција на обична настинка.

Коронавирусот и неговите протеини

Во нова студија истражувачите анализирале примероци на крв собрани од лица помеѓу 2015. и 2018. година, значи многу пред КОВИД-19 прв пат да се појави во Вухан.

Тие примероци крв содржеле Т-клетки кои реагирале на четири различни коронавируси кои предизвикуваат инфекции на настинки, но и на SARS-CoV-2. Оваа студија понудила силни молекуларни докази дека Т-клетките можат да “видат“ секвенци кои се многу слични кај вообичаените коронавируси и SARS-CoV-2.