На количината на потење влијаат полот, возраста, тежината, емоционалната состојба, односно нивото на стрес (кое влијае и на мирисот на потта). Колку сме постари и потешки и под поголем стрес, повеќе и ќе се потиме. Мажите повеќе се потат од жените, бидејќи нивните потни жлезди мораат посилно да работат за да се разладат.
Постојат два вида на потење – терморегулаторно и емоционално.
Емоционално е одговор на стресна состојба. Стресот го активира хипоталамусот кое е еден вид на регулатор на температурата на телото. Кога сме под стгрес, хипоталамусот испраќа невротрансмитерски сигнали на жлездите кои создаваат пот, објаснуваат стручњаците.
Некои луѓе повеќе се потат поради хиперхидроза – состојба во која потните жлезди претерано работат, и станува очигледна во адолесценцијата.
Потењето е нужно за да спречи презагревање, но доколку претерано се потиме, треба да се провери здравствената состојба. Болести како дијабетес и проблеми со штитната жлезда може да предизвикаат прекумерно потење. Исто така, причина може да бидат и некои лекови против депресија, мигрена и болки.
