Можеби не сте знаеле, но луѓето спијат на перница уште откако знаеме за себе, а некои археолози откриле перници кои датираат уште од Месопотамија, кога луѓето користеле парчиња камен за да ја поткренат главата додека спијат. Во стариот Египет, исто така, се користеле парчиња камен, а во Кина порцелан и керамика… Со оглед на тоа дека сето наведено е дел од историјата, заклучокот е дека перницата ни е неопходна за спиење од нашето создавање. ‘Рбетниот столб на човекот е природно закривен и перницата е круцијална за неговата природна положба. ’Рбетот на секој човек е различен, но нормалното порамнување на ’рбетот е она кое подразбира дека може да се повлече права линија од ушите до зглобовите. Нашата поза за спиење треба да ја има токму оваа положба.
За правилна положба на ’рбетот е заслужен добриот душек, додека перницата е клучна за положбата на вратот и добрата положба на телото. Доколку ’рбетот не ни е во правилна линија тогаш доаѓа до појава на главоболки, болка во мускулите и зглобовите, лигаментите, па дури и до сериозни повреди. Постои ризик од појава на хронични заболувања и болки кои можат да бидат иреверзибилни.
Ако користите перници на погрешен начин не си правите услуга. 99 проценти од луѓето спијат со перници во креветот, додека 27 проценти користат три или повеќе перници. Најдобро е да користите една, максимум две. Доколку спиете на страна користете две перници, и тоа една за главата,а друга за меѓу колената.
Ако спиете на стомак, користете екстра тенка перница или не користете воопшто затоа што во оваа положба грбот веќе природно ви е закривен и вратот сам по себе достигнува природен агол.
Од кој материјал ќе ви биде изработена перницата зависи од вашиот личен избор, па можете да бирате меѓу перници полнети со пердуви, перници од мемориска пена или полиестер. Перниците полнети со пердуви се високо квалитетни, но предизвикуваат алергии кај голем број луѓе. Мемориската пена е подобра за обликување, но е поскапа. Перниците од полиестер не прават ништо добро за вашиот ’рбетен столб.
Како и да спиете, каква и да ви е перницата, ќе се согласите дека се е подобро од спиење на камен како во стар Египет. Доколку не знаете сами да направите избор, распрашајте се во специјализираните продавници на перници и душеци и обидете се да го одберете најдоброто за вашето тело – бидејќи сепак сонот е од огромно значење за здравјето!
