Ганглион или меѓу луѓето позната како мртва коска претставува циста која се појавува од ткивото кое ги обложува зглобовите и тетивите. Вообичаено се појавува на рачниот зглоб, но може да се создаде и на други места – колено, стапало, зглобови.
Станува збор за бенигна творба која обично не предизвикува проблеми, но понекогаш може да активира други симптоми или да биде знак за ран артритис.
Причината за појава на ганглионот е непозната, но се знае механизмот на нејзиното создавање. Станува збор за прекумерно собирање на неопходната синовијална течност која ги подмачкува зглобовите и тетивите со што се олеснува движењето и се намалува триењето кое може да доведе до оштетување на зглобните структури. Се претпоставува дека до претерано трупање на синовија доаѓа поради микротрауми во областа на зглобот или повторување на одредено движење, што често се среќава во одредени занимања. Ваквите ганглион цисти често се појавуваат кај пациенти кои имаат артритис. Насобирањето на синовијална течност околу зглобот создава тркалезна ганглион циста поврзана со мала петелка за тетивата или зглобот, која постепено расте.
Понекогаш ганглионот може да остане незабележан, но на рачните зглобови често е испакнат и се манифестира како необичен и непријатен израсток на кожата.
Ганглион цистата обично е изолирана појава и се создава само на едно место. Во 65 % од случаите на рачниот зглоб. Најчеста е кај лица на возраст од 20 до 50 години, трипати почесто кај жените отколку кај мажите. Mоже самостојно да се повлече или спонтано да пукне и да исчезне.
СИМПТОМИ
Најчесто цистата се манифестира само како видлив оток на зглобот, но понекогаш може да биде причинител и на други симптоми:
- Болка во пределот на цистата;
- Трпнење во шаката и стапалото;
- Намалена подвижност во зглобот;
- Чувство на затегнатост, обично во пределот на потколеницата кога станува збор за т.н. Бакерова циста.
Понекогаш ганглион цистата не е видлива, а предизвикува болка при движење, најчесто при истегнување на рацете, па затоа потребно е да се сними зглобот за да може точно да се утврди дијагнозата.
Ако не предизвикува болка и други непријатни симптоми, ганглионот не е потребно да се лекува. Тој повеќе е естетски проблем и пациентите инсистираат на негово отстранување.
