Афтите се ранички во усната шуплина, се појавуваат кај 20 отсто од луѓето. Почесто се појавуваат кај помладите жени. Стрес, слаб имунитет, слабокрвност, болести на желудникот и цревата, но и одредени лекови може да влијаат на појавата на афти. Најчесто се појавуваат на јазикот, слузницата на образите или усните, а никогаш на тврдото непце. Може да се мали, големи и слични на херпес.
Мали се оние до еден сантиметар, во просек траат од 7 до 14 дена и не оставаат лузни. Големите афти се оние поголеми од еден сантиметар и можат да траат од четири до шест недели. Побавно зараснуваат затоа што станува збор за подлабока раничка. Кога ќе се појават тогаш се зголемуваат и лимфните јазли.
Афтите налик на херпес или херпетиформните афти се ранички со големина од 1 до 2 милиметри и доаѓаат во наслаги. Најчесто се појавуваат под јазикот и на слузницата на образите и јазикот. Потсетуваат на херпес, но со него немаат никаква врска. За разлика од херпесот, кај афтите нема температура и болки во телото.
За да се ублажат симптомите внимателно мијте ги забите. Користете меки четкички. Кај афтите одбегнувајте тврда храна, како на пример, корка од леб, чипс, тврдо месо или пржена риба. Тоа може само да ја надразни афтата и да ја засили болката.
Одбегнувајте кисели и силни напитоци како алкохол и газирани пијалаци. Истото важи и за зачините – не користете кисели и силни зачини. Врелата храна и пијалаци, исто така, ги влошуваат симптомите. Се смета дека афтата може да се создаде и при користење на некои пасти за заби, па затоа превентивно можете и да ја смените пастата што ја користите.
