Нашиот желудник е исклучително важен орган: тој овозможува да се свари храната и да се елиминираат микробите што ја придружуваат. За да ја свари, желудникот ја става храната во моќна киселост. Тој произведува голема количина на хлороводородна киселина. Непријатното жарење (печење) се случува кога киселината се шири кон горниот дел на желудникот, односно во долниот дел на хранопроводот, кој е особено чувствителен на киселина. Инаку, самиот желудник во голема мера е прилагоден на присуството на киселини. Затоа, според лекарите терминот „киселини во желудникот“ не е сосема точен. Поправилно е да се зборува за киселини во долниот дел на хранопроводот. Оваа област, која се наоѓа зад градната коска е многу близу до желудникот, па затоа сите ја мешаат со него.
Киселините – симптом на ГЕРБ (гастроезофагеална рефлуксна болест)?
Факторите кои го објаснуваат чувството на горење во т.н. желудник се многу. Зголемувањето на киселини кон хранопроводот и појавата на гастроезофагинален рефлукс се главната причина. Храната што ја консумираме оди преку хранопроводот. Во долниот негов дел се наоѓа сфинктер (мускул) кој се отвора (опушта), за да ја пропушти храната кон желудникот.
Сфинктерот потоа треба да се затвори. Но кај некои лица тој не функционира добро и се отвора надвор од процесот на пропуштање на храната за во просек околу 20 секунди и така пропушта киселина кон хранопроводот. Зголемувањето на киселини кон хранопроводот се фаворизира од силно дуење на желудникот при консумирање обилно количество храна, од голем стрес или од претерување со алкохолот. Кај некои луѓе мускулот кој го поврзува долниот дел на хранопроводот со желудникот е постојано вознемирен. Причината за оваа „повреда“ е непозната. За несреќа, овие лица страдаат од постојани киселини што треба да се третираат секојдневно.
Вообичаено лицата над 40 години се жалат на киселини во желудникот. Но лекарите истакнуваат дека овие симптоми можат да се појават и по 20-годишна возраст, па дури и во пубертет. Хигиената на живот и околината играат важна улога во спречувањето на овој проблем. За да се заштитите од непријатните чувства избегнувајте да консумирате храна која фаворизира појава на киселини (масти, силни зачини, газирани пијалаци, чоколадо …) Ограничете го алкохолот и цигарите. Пожелно е после јадење да се движите или да имате каква било физичка активност, а не веднаш да легнете.
Киселината во желудник најчесто е бенигна болест и реагира на соодветен третман. Постојат хербални лекови кои помагаат во управувањето со непријатните симптоми. Сепак, консултација со лекар е од суштинско значење ако желудочната киселина е придружена со други симптоми кои го влошуваат квалитетот на животот: губење на тежината, тежок замор, неспособност да се проголта храната на поголеми парчиња. Овие симптоми бараат дополнителни истражувања, како што е стомачната ендоскопија, што овозможува откривање на тешки патологии како карцином на желудник или хранопроводот.
