Во повеќето случаи се храниме нездраво бидејќи дома чуваме нездрави намирници како што се индустриски грицки, газирани пијалаци и слично. Истражувањето покажало дека можеме да одолееме на купување нездрава храна доколку пред да заминеме на пазарање каснеме некое овошје.
Имено, луѓето кои консумират здрави закуски пред да тргнат во супермаркет, избираат здрави намирници кога ќе се најдат меѓу полиците, ова е заклучокот од студијата спроведена под водство на д-р Анер Тала за магазинот „Психологија и маркетинг“.
Испитаниците биле поделени во три групи: едни пред да отидат во продавница изеле парче јаболко, вторите – бисквит, а третите заминале со празен стомак. Истражувачите откриле дека консументите на јаболко купиле 28 отсто повеќе зеленчук и овошје од оние што јаделе бисквити, и 25 отсто повеќе од оние што не јаделе ништо.
До слични резултати дошле и истражувачите од една друга студија, кои на купувачите пред заминување на пазарење им дале по една чаша чоколадно млеко. На едната група и рекле дека пие здраво млеко, а на другата дека станува збор за декадентен пијалак.
Оние кои мислеле дека пијат нешто здраво, одбрале здрави намирници во супермаркетот.
Затоа ако сакате да се заштитите од насобирање на нездрави производи во вашиот дом (а со тоа и опасност да ги изедете), каснете малку овошје или зеленчук пред да заминете во продавница, советуваат експертите.
