Освен возрасните и децата може да страдаат од висок холестерол. Најалармантна е состојбата во САД, каде Американската академија на педијатри апелира дека тестирањето на нивото на холестерол во крвта кај децата треба да почне да се прави по втората година од животот, а најдоцна до 10-година, но кај децата кои имаат висок ризик за развој на ваквата состојба. За оваа група ризик фактори се смета се состојби кога нивните родители или поблиски членови на семејството имале срцев удар или им се дијагностицирани затнувања на артерии или други болести на крвните садови, ако некој во потесното семејство има историја на висок холестерол, постои непозната историја на болести во семејството (посвоени деца) или оние кои имаат историја на болест како што е дијабетес, висок крвен притисок, прекумерна тежина.
Оние деца кои ги немаат овие ризик фактори, педијатрите препорачуваат првото испитување на нивото на холестерол да се направи меѓу 9 и 11 година од животот и следното меѓу 17 и 21 година.
Како причина за ова тие го наведуваат податокот дека со одржување на оптимално ниво на холестеролот кај децата може да се спречи појава на срцеви заболувања подоцна во животот. Високиот холестерол е главен причинител за атеросклероза, т.е стврднување на аретериите, а тоа е главна причина за болести на срцето. Стручњаците велат дека трагите на маснотии, како сигнал за почеток на атеросклероза може да се јават во првата деценија од животот на децата. Доколку останат незабележани, тие може да направат опасни масни наслаги кои може да ги блокираат и стврднат артериите во возрасниот период.
Срцевите заболувања кај децата се многу ретки, но во тој период ризик факторите за болести на срцето почнуваат да се развиваат. Освен проверката на холестеролот се препорачува и редовна проверка на крвниот притисок, како и индексот на телесната маса.
Она што особено го истакнуваат педијатрите е дека дебелината не е единствената причина за висок холестерол кај децата. Другите причини вклучуваат дијабетес, болести на црниот дроб, бубрезите или нарушување на работата на тироидната жлезда.
Високиот холестерол кај децата се открива со едноставен тест преку крвта. Доколку резултатите покажуваат покачен висок крвен притисок, истиот тест потребно е да се повтори за извесен период за да се потврдат резултатите.
Зошто е важно да се мери холестеролот кај децата:
- Нивото на холестерол може да се покачи во периодот пред пубертетот и во раниот пубертет. Вредностите на холестеролот кои сте ги добиле пред овој период може да ви дадат подобра оцена за тоа колку треба да изнесува холестеролот во подоцнежните години.
- Раното откривање на високиот холестерол ќе му укаже на педијатарот дека треба да се следи детето и што поскоро да се променат неговите животни навики (исхрана, активност).
