Следниот пат кога ќе почувствувате глад меѓу оброците, место грицки и слични солени и слатки калорични ужини, одберете ги бадемите. Бадемите изобилуваат со протеини (во дваесетина бадеми има дури 6 грама протеини!), кои се неопходни за изградба и одржување на мускулите, додека истовремено брзо ја „убиваат“ желбата за храна и гладта и заситуваат.
Содржат и здрави, незаситени масни киселини кои се наши сојузници во превенцијата од болести на кардиоваскуларниот систем. Благодарение на линолеинската киселина (омега-6) и влакната кои ги содржат, бадемите помагаат во регулирањето на нивото на холестерол во крвта. Кога уште станува збор за превенцијата од болести, интересно е и дека се покажало оти бадемите помагаат во превенцијата од појава на камен во жолчното ќесе.
Сепак, со оглед на тоа дека дури 50 проценти од бадемите ги прават масти, мошне се калорични (575 kcal на 100 г), па затоа би било добро да се консумираат во умерени количества.
Идеална порција се токму дваесетина бадеми дневно (шака бадеми, околу 160 kcal), а ако сте доста активни физички тогаш може и до две шаки бадеми дневно.
Од витамините и минералите, бадемите се богати со витамини Б2 и Б7 (биотин), како и со витамин Е, додека содржат и поголеми количини манган, бакар, фосфор и магнезиум.
