Главно сите се сметаме за метеоропати, но која група меѓу нас е особено погодена и кога? И кога времето всушност е опасно за здравјето?
Иако повеќето луѓе се плашат од високите температури на воздухот, опасни може да бидат и високите и ниските температури. Без разика што се верува во спротивното, истражувања покажуваат дека зимските и ладни периоди може да бидат поопасни за здравјето од жешките и летни периоди.
Метеоропатските тегоби најизразени се при нагли промени на температурите, нагли промени на атмосферскиот притисок, наглиот пораст на влажноста на воздухот, зголемената концентрација на полен во воздухот и појава на ветрови.
Се повеќе време се поминува во затворен простор и со тоа се намалува можноста организмот да се носи со промените на времето.
Забрзаниот начин на живот во кој има се повеќе негативни влијанија како што е стресот, губење на животните вредности, постојаниот натпревар околу напредување, нередовната исхрана, телесната неактивност и загадениот воздух доведуваат до зголемен број на метеоропати. Жените во средна возраст, постари лица и хронични болни поподложни се да станат метеоропати, како и лицата кои боледуваат од анксиозност и депресија, објаснуваа лекарите.
Лицата над 70-годишна возраст се особено чувствителни на временските промени, поради лошата способност за регулирање на телесната температура и зголемениот праг на потење во споредба со помладата популација. Но, последните години, старосната граница на лица кои здравствено ги чувствуваат временските промени е симната, потенцираат лекарите.
Големите промени на дневните температури може да го зголемат бројот на отчукувања на срцето, да предизвикаат нагли промени во циркулацијата и да бидат тригер за кардиопулмонални и други болести и да доведат до кобни последици. Истражувањата покажале дека затајувањето на срцето е почесто при промени во дневните температури.
