Се бараат: Лидери за свет без ТБЦ.
Можете да направите историја. Ставете и крај на ТБЦ.
Светски ден на туберкулозата 2018
Најновите податоци од Светската здравствена организација (СЗО) говорат дека се намалува бројот на нови пациенти со туберкулоза со просечна стапка од 4,3 отсто годишно во Европа. Сепак, овој тренд не е доволен за да се стави крај на епидемијата на туберкулоза до 2030 година, а тоа е и причината поради која СЗО ги повика државите да ги забрзаат напорите и еднаш засекогаш да ја искоренат туберкулозата.
Од СЗО истакнуваат дека со Акцискиот план за туберкулоза за европскиот регион, во периодот 2016 – 2020 година, со одлучни акции, во овој регион за пет години ќе се спасат над 3 милиони животи и 48 милијарди долари.
Во одбележувањето на Денот се вклучи и Здружението на пневмофтизиолози на Македонија кое во ЈЗУ Институтот за белодробни заболувања и туберкулоза одржа стручен состанок по повод Светскиот ден на туберкулозата, кој оваа година се одбележува под мотото „Се бараат лидери за свет без туберкулоза“. Заклучокот од состанокот е дека во последните десет години во континуитет се намалува бројот на новорегистрирани случаи на болни од туберкулоза во земјава.
Целта на Светскиот ден на ТБЦ е подигнување на јавната свест за епидемијата на туберкулоза и за напорите за елиминирање на болеста
Во 2012 година, вкупно 8,6 милиони луѓе беа заболени од ТБЦ, а 1,3 милиони луѓе починаа од оваа заразна болест, главно луѓе од Третиот свет. Светскиот ден на ТБЦ е една од осумте официјални кампањи за глобално јавно здравје на Светската здравствена организација.
Денот го слави откритието на д-р Роберт Кох, кој во 1882 година ја шокираше научната заедница со објавувањето на веста дека ја открил причината за туберкулоза, бактеријата Mycobacterium tuberculosis. Во тоа време туберкулозата беснеела низ Америка и Европа, а од седум починати лица, едно од нив било поради ТБЦ. Откритието на Кох го отвори патот кон дијагностицирање, како и лекување на туберкулозата.
Туберкулозата е заразна болест предизвикана од бактерија Mycobacterium tuberculosis. Инфекцијата се пренесува преку воздух, исклучително ретко на друг начин. Најважниот извор на пренесување на инфекцијата се пациенти со пулмонална туберкулоза. Кога лицето со нетретирани инфективни, туберкулозни бели дробови кашла, се смее или зборува, исфрла во воздухот бацили заедно со капки од плунка. Овие мали честички долго лебдат во воздухот, а преносот на инфекција се случува кога друго лице ќе ги вдиши.
Туберкулозата е излечива болест, но по заздравувањето не се стекнува имунитет од повторна инфекција
Бактеријата првенствено ги погодува белите дробови, иако може буквално да има влијание врз секој орган: лимфни јазли, кожа, мозок, коски и зглобови, дигестивен, уринарен систем. Симптомите на оваа болест се некарактеристични. Обично е присутен замор, општа слабост, субфебрилни температури, губење на апетитот и губење на тежината, зголемено ноќно потење и сува кашлица, која подоцна може да биде придружена со искашлување. Во тешки форми на болеста може да има и крв при кашлањето, болка во градите и тешкотии при дишењето. За да се потврди болеста, неопходно е да се направи рендген на белите дробови и испитување на секретот, основни крвни тестови и туберкулинското тестирање. Туберкулозата е излечива болест, но по заздравувањето не се стекнува имунитет од повторна инфекција.
