Постојат бројни причини кои предизвикуваат притисок во ушите. Евстахиевата туба е отвор кој се наоѓа на задната страна од носот и грлото и оди до средното уво. Главна функција на Евстахиевата туба е проветрување на просторот на средното уво за да се изедначи надворешниот притисок на воздухот со притисокот на средното уво. Оваа цевка е затворена и се отвора кога лицето голта, џвака или се прозева. Во случај кога надворешниот притисок на воздухот е поголем од притисокот во средното уво, се јавува болно и непријатно чувство и притисок во увото и тогаш Евстахиевата туба е блокирана. Таа може да биде оштетена или отечена, бидејќи воздухот останува заробен и предизвикува насобирање на притисок.
ПРИЧИНИ
Притисокот во ушите може да биде предизвикан од промени во надморската висина, а честа појава е при нуркање, планинарење и летање. Симптоми на оваа појава се болки и непријатност во ушите, мало оштетување на слухот и затнати уши, како и вртоглавица. Кај некои потешки случаи се јавува и крварење од носот, губење на слухот и притисок во ушите. Разни инфекции на увото, како респираторни инфекции кои ги опфаќаат грлото, носот и синусите, го акумулираат притисокот на воздух во средното уво и предизвикуваат блокада на Евстахиевата туба. Бактериски инфекции кои настануваат од заразена рана или пирсинг, исто така може да влијаат на увото предизвикувајќи притисок и болки. Здравствени проблеми како алергија, расцеп на непца и слично се наведуваат како можна причина за појава на притисок во увото. Алергискиот ринитис доведува до притисок во синусите.
Ушниот притисок не мора нужно да се појави веднаш, туку да се развива подоцна со пропратна појава на затнување на увото, кое предизвикало насобирање на слуз во средното уво. Најчести симптоми кои се однесуваат на затнатото уво се чувство на притисок или полно уво, тешкотии поврзани со слухот, чувство на пукање во ушите, ѕвонење, но и проблеми со одржувањето на рамнотежата. Евстахиевата туба кај децата е пократка отколку кај возрасните, па од таа причина децата се посклони на оваа појава.
Дисфункција на Евстахиевата туба
Притисокот во ушите и главата може да предизвика и дисфункција на Евстрахиевата туба. Тоа е состојба кога тубата не може да се отвора правилно и да овозможи проток на воздухот и изедначување на притисокот, па од оваа причина се јавува болка и поголем притисок во увото. До дисфункција може да дојде при пливање или настинка. Притисокот може да трае кратко, но може да биде и долготраен.
За појава на притисок во ушите не е неопходен надворешен фактор: постојат случаи на лица родени со тесна Евстахиева туба или недоволно функционална, па често се блокира и предизвикува ушен притисок. Притисокот и шумот во ушите не се безопасни појави, а може да укажат и на некои други болести, како оштетување на увото, тумори, пореметена функција на Евстахиевата туба, насобирање на ушен секрет и слично. При честа појава на притисок во уште при извршување на секојдневни активности, се препорачува посета на лекар.
