Можеби веќе навикнавте меѓу нашите редови да читате текстови кои се однесуваат исклучиво на здравјето, болестите, симптомите… овој пат ќе направиме исклучок. Ви носиме една трогателна и во исто време многу поучна приказна за тоа колку децата понекогаш знаат и умеат да бидат многу поголеми луѓе од нас, возрасните. Колку децата знаат несебично да покажат љубов, емоции… Колку можат многу повеќе да помогнат во тешки моменти… Приказната дефинитивно ќе ви измами солзи, но и ќе ве натера да размислите.
Кога Пол Барнет го запознал Кемден Хушан биле во градинка. Многу брзо се спријателиле. Почнале да се дружат глумејќи суперхерои и правејќи смешни видеа. Останатите деца го одбегнувале Кемден заради неговата врзаност за инвалидска количка, но не и Пол. Тој дури во еден момент, по една случка, и решил на својот најдобар пријател да му помогне, односно да собере пари за нова количка која ќе му го олесни движењето.
Кемден кој живее во Калифорнија, е роден со тумор на Th2 и Th3 пршлените, а туморот бил толку голем што се формирал околу ’рбетниот столб. Иако после три операции туморот му бил отстранет, Кемден останал параплегичар и сега се движи само со помош на инвалидска количка. Онаа која ја имал му била тешка, а тој понекогаш дури и имал проблеми да ја турка и да управува со неа. Еднаш овие двајца другари биле на излет, количката „заглавила“ и се превртела, а Кемден паднал. Пол решил да стори нешто за случката да не им се повтори.
Бидејќи родителите на Кемден не биле во можност да купат нова количка, а државната здравствена служба ги покривала трошоците за нова количка на секои пет години, Пол и рекол на мајка си дека сака да направи нешто за својот другар, за да му помогне и да му го олесни движењето.
Без негово знаење, на страницата GoFundMe покренал акција за собирање пари за нова количка, потполно прилагодена на потребите на Кемден. За две недели Пол собрал речиси 6 000 долари, надминувајќи ја потребната сума од 3 900 долари за нова количка. Неговиот другар, но и целото негово семејство биле воодушевени…
Ете така прават вистинските пријатели и големите луѓе!
